Vawiin chawhnu khan Chaltlang YMA Hall ah New Delhi hmun hrang hrang a thla 4 chhung thiam thil training tura Mizoram Youth Commission(MYC) in a thlan chhuah thalai 62 te thlahna leh fuihna hun a buatsaih a. He hunah hian training tur te chu MYC Chairman Pu T.Sangkunga, MLA leh MYC hotu ten Delhi hmuna training nei tur te hnenah fimkhur tulna leh hriattur pawimawh te an hrilh hriat a ni.

MYC Chairman Pu T.Sangkunga chuan Sawrkarah hna zawng apiang tan hna hmuh theih a nih tawh loh thu leh tun dinhmunah phei chuan hnathar siam leh hnaruak hnawh khah khap rih a nih thu sawiin thalai hnazawng tan state pawna eizawnna dap a tul takzet thu a sawi a. Mizoram sawrkar hnuaia MYC hmalakna a training chhuak 75% aia tam mah te hi an trainning na institution-ten hna an hmuhsak ngei ngei thin a ni a ti. Hei hi Institution-te hian an hnuaia training 75% chin tal hna an hmuh sak loh chuan Ministry of Labour & Employment atanga training senso an dawn turte an dawn theih dawn loh vang a ni a ti. July, 2014 atang khan MYC in training tura a tirh 192 in hna an hmu tawh thu leh 959 in training an neih mek thu a tarlang a, December thla a vei meuh chuan hna hmu hi 300 an tling turah ngaih theih a nih thu a sawi. MYC Chairman hian training tura tirh tak hlawhchham tlemte te chu zu leh ruihhlo rui thin leh zirna ngaihthah an nih thu sawiin vawiin a training tura thlah takte chu zu leh ruihhlo laka inthiar fihlim turin a chah a. Harsatna an neih phawt chuan MYC hotute chu an inhawn reng tur thu leh MYC hotute chu biak pawh hmasak ber tur an nih thu a tarlang bawk a ni.

Training na hmun tur hi Softdot Hi-Tech Educational & Training Institute a ni a, an ni hian New Delhi hmun hrang hrang – South Extension, Pitampura, Janakpuri leh Preet Vihar ah te training centre an nei a ni.

Heng training Centre ah hian vawiin a thalai 62 thlanchhuah te hian thla 4 chhung Information & Communication technology, Media developer(Web Designing), Banking & Accounting, Travel&Tourism,Hospitality leh Soft skills te an zir dawn a ni. Zirlai te senso hi Ministry of Labour & Employment in a tumsak niin zirlai pakhat tan thla tin Rs. 10,000/- a sen sak dawn a. MYC hotute chuan zirlai awmtha duhlo hun laklawh a haw ching te chuan an mahni sensova an haw a ngaih dawn bakah nakin zelah MYC hmalakna hnuaia ham thatna te an dawn theih tawh loh tur thu an tarlang a ni.