Vawiin khan Rangvamual-a leimin paihfai hna November ni 15 leh ni 17 inkarah thawh tur chungchangah Aizawl DC Dr. Franklin Laltinkhuma hovin a Office-ah meeting neih a ni a. November 15-17, 2014 chhungin Rangvamual-a leimin paihfai hna thawh a nih dawn avangin hemi hun chhung hian helai kawngpui hi lirthei eng chi mah kal phal a ni dawn lova. Chuvangin hemi chungchanga thil tul hrang hrangte sawiho tura meeting hi koh niin a hnuaia mi ang hian ruahmanna siam a ni.

1) Road Block siam chhung hian lirthei te chi (LMV) leh two-wheeler chu Sakawrtuichhun-Lungverh kawngah an kal ang a, lirthei laihawl (MMV) erawh chu tlai dar 6:00 atanga zing dar 10:00 inkarah an kal phalsak an ni ang. Lirthei lian chi (HMV) erawh chu helai kawngah hian kal phal loh hrim hrim a ni ang a, Durtlang – Kawnpui road lamah an kal thin ang.

2) Aizawl atanga lirthei kalte chu Pu Lalruatkima Petrol Pump bulah dan chah vek tur a ni ang a, Phunchawng lam atanga lirthei rawn kalte chu Ch. Chhunga Truck Terminal bulah dan chah tur an ni ang.

3) Leimin chhak lam leh thlang lamah hian ruihhlo zuar leh zu ruite zalen taka an chet lohna turin Excise & Narcotics Department leh Police ten theihtawp an chhuah ang. Khawl in hna a thawh laiin kea kal tlang pawh phal a ni lo ang.

4) PTC Peng bula lirthei kal vel lo vil turin Commandant, 5th IR Bn. chu a sipaite lo duty tir tura ngen a ni.

5) SP Aizawl, SP Traffic, Supdt. of Excise leh Commandant, 5th IR Bn. te chu ni 13.11.2014 aia tlai loah an detailment order te District Magistrate, Aizawl hnenah thehlut hman tura beisei an ni.

6) Hemi chhunga duty te ei leh in senso chu DC, Aizawl in a tum ang.

7) Rangvamual Local Council hruaitute leh Branch YMA hruaitute chu duty te theihtawpa lo tawiawm turin beisei an ni.