1963/2026-2027

Dated Aizawl, the 27th August, 2026 : Vawiin khan Mizoram University (MZU)-a School of Social Sciences (SSS) Dean's Multipurpose Hall-ah Mizoram Youth Commission(MYC) leh MZU-a Department of Sociology tangkawp te chuan "One-Day Career Guidance and Counselling Programme" an buatsaih a, MYC Chairman Pu Malsawmzuala Ralte chuan khuallian niin he hun hi a hmanpui.

Khuallian Pu Malsawmzuala Ralte chuan tum nei saa lehkha zir a tul thu sawiin, kan tum tak kan thleng ta lo a nih pawhin, eng emawah tal hlawhtlin a awlsam bik thin a ti a. Khuallian chuan sawrkar hna chu hna tha leh ngelnghet a nih rualin thawh tuma exam thinte zingah zaa 10 bawr vel bak in hlawhtlinna an chang ngai lo tiin, Skill base hna te leh entrpreneurship lam te rilrua neih a that thu a sawi bawk a. Mahni kea din tum hi thalai changkang zia a nih thu sawiin, kal khawmte chu an kal zelna turah duhsakna a hlan bawk a ni.

Vawiin Programme hawnna hun hi Dept. of Sociology-a Asst. Professor Dr. B. Lalzarliana'n a kaihhruai a, SSS Dean Prof. H.K. Laldinpuii Fente chuan khual zahawm niin thu a sawi a. Programme hawnna inkhawm hi Guidance and Counselling Programme-in a chhunzawm nghal a ni.

Guidance and Counselling Programme hi Technical Session hnih ah then niin, Session hmasa zawk thupui atan hian 'Entrepreneurship Opportunities' hman a ni a.  Tawlloh leh NERD Montage Co-founder Dr. Lalhmangaihsanga Renthlei chuan mahni kutkawiha sumdawnna bultan theih dan kawng hrang hrang chungchang a zirtir a. 

Technical Session hnuhnung zawk thupui atan hian 'Job Opportunities in the Government Sector' hman niin, OSD to Chief Secretary Pu Elijah L.H. Sanga chuan sawrkar hna hrang hrang awm thei te leh chumi atana zirlaite inbuatsaih theih dan tur kawng a zirtir bawk a ni.