1962/2026-2027

Dated: Mamit the 27th of August,2026: Vawiin khan Mamit Multipurpose Indoor Stadium-ah  9th Inter District Wrestling Championship,2026 chu Pi Carolyn L.B. Khiangte, Addl DC Mamit chuan Khual Lian niin kharna hun a hmang.

Pi Carolyn L.B.Khiangte chuan he 9th Inter District Wrestling Championship 2026 a lo kal te chu Mamit District Sports Committee hmingin chibai bukna a hlana, state level championship Mamit district in a thleng thei chu lawmawm a tih thu sawiin a thleng tu Mamit District Wrestling Association chu fakawm a tih thu a sawi a. Khual Lian chuan he intihsiaknaa lo tel te chu mi fel, ruihhlo laka fihlim mi entawntlak tak tak an nih a beisei thu sawiin an kal leh zelnaah ruihhlo laka fihlim zel tur leh mi midang te tana entawntlaka awm zel turin a chah. An lehkha zir inthlahdah lo tur leh he infiamna hi an hun awl hmanthat nan leh zirna ti nuamtu zawk atan hmang theuh turin a chah bawk.

Pi Carolyn chuan vawiin intihsiaknaa tel te chuan he infiamna hi gentleman’s game a ni tih an entir a ni tiin an chak loh pawha thìnrim loa chibaia tha taka an inthlah thei zel chu ropui a tih thu a sawia, taksa chak bakah rilru chhelna he infiamna hian a ti lang hle a ni a ti bawk. Mizo mipa leh hmeichhia he infiamnaa tuite chu tei rei peihna nena bei zel tur leh Mizoram tan mai ni lo India tan khawvel infiamna stage lian Olympics a tel thei ngei turin duhsakna a hlan a ni.

9th Inter District Wrestling Championship, 2026 hi  Mizoram Wrestling Association buatsaih a ni a. He intihsiaknaa Team Champion  chu Kolasib District niin gold medal 7 an la a, Runner's up - Aizawl District niin gold medal 6 an la a ni. Lawmawm hrang hrang sem niin 

1. Most Promising Girl-ah: Mary Lalduhawmi, Mamit District

2. Most Promising Boy-ah: Benjamin C. Lalrempuia,Aizawl District

3. Best Wrestler Girls-ah - Ruthi Lalmuatdiki, Kolasib District

4. Best Wrestler Boys-ah - Johny Lalhlawntluanga,Saitual District

te an ni. 9th Inter District Wrestling Championship, 2026 wrestler tel zawng zawng hi mi 186 niin, hmeichhia 45 leh mipa 141 te an ni a.

1. Mamit District atangin : Hmeichhia 12, Mipa 36

2. Aizawl District atangin: Hmeichhia 6, Mipa 31,

3. Kolasib District atangin: Hmeichhia 10, Mipa 16

4. Serchhip District atangin: Hmeichhia 5, Mipa 23

5. Lunglei District atangin Mipa 1

6. Saitual District atangin Hmeichhia 12, Mipa 34 te an ni.

Vawiin hun hi Pu Vanlalruata, Vice President,MWA in kaihruaiin Pu Ngurthansanga, President MWA chuan thusawiin hun a khar.