54/2024-2025

Dated Hnahthial, the 4th April, 2025: Mizoram Youth Commission, Hnahthial Sub- Hqrs YMA, Eleos Study Centre leh D&M Study Centre te tangkawp chuan Hnahthial District chhunga Mizoram Police Constable hna exam pe turte tan coaching class an buatsaih a. "Empowering Aspirants: Mizoram Constable Recruitment Coaching Class : 2025" hawnna hun chu vawiin khan Government Hnahthial College (GHC) auditorium-ah hman niin Pu Lalsiamthanga, Principal, GHC chuan khuallian niin a hmanpui a. Eleos Coaching Centre neitu, Eleazar Rozarmawia ( Eleazar Tetea Hmar) chuan he hna exam turte hnenah fuihna thuchah a sawi a ni.

Khuallian, Pu Lalsiamthanga chuan hetiang hun tha tak mai Hnahthial District-a buatsaih thei a ni hi lawmawm a tih thu a sawi a. Mizo thalaite chu tuar tichhel tura fuihin kan tum tak tak chuan state dang ami te aiin kan duai bik lo a ni a ti a. India ram ropuina pakhat chu chhungkaw inrelbawlna tha tak kan nei thin hi a nih thu sawiin chumi tur chuan a bikin mipate kan pawimawh thu a sawi a. Chumi vang tak chuan Mizo mipate chu tan la lehzual tura fuihin chhungkaw tha tak din thei ngei turin an thiltih engkimah tan la turin a fuih a. Eng hna pawh hi hna zahawm vek a nih thu sawiin zahawmna tak tak chu hnaah ni lovin a mihringah innghah thu a sawi bawk. Ruihhlo intihbuai tir mai lo tura chahin, mahni leh ram tan theitawp chhuah a, bei hram hram theuh turin a fuih a ni.

Hun kaihruaitu, Pu K Lalzuimawia, Chairman, Education & Youth Affairs Committee, YMA Hnahthial District chuan thalaite tan MYC hian Programme pawimawh tak tak an buatsaihsak thin thu talangin tun Mizoram Police Constable Recruitment 2025, pawh hi an sponsor chu lawmawm a tih thu a sawi a. Kum 2021 ah khan MYC sponsor in 'Core Team on Skill Development Framework, Hnahthial District' chuan Hnahthial District Skill Development Programme hnuaiah Cement Mistiri Training leh Ar vulh Training te a lo kalpui tawh thu sawiin kum 2022 khan MYC bultum bawk hian ‘Livelihood Regeneration Programme on Skill Training (Cement Mistiri & Food Processing) neih a ni lo ni tawh thu a tarlang a ni.

Eleazar Rozarmawia chuan kalkhawm aspirants-te hnenah fuihna thuchah sawiin tun Police Constable hna hi an lo tling ta lo a nih pawn hnual mai lo turin a chah a. Mizoram chang ni lovin Central lamah pawh hna exam tur a tam thu sawiin Hnahthial thalaite chu chung te pawh chu exam ve turin a fuih a. SSC-ah pawh hian exam tur a tam thu sawiin tun kumah pawh SSC hnuaiah exam pariat (8) a awm tur thu tarlangin chu chang ni lovin Airforce lamah pawh kum tin April leh September-ah exam a awm thin thu a tarlang a ni.

Sub Headquarters YMA President, Pu Hmingthanzuala chuan Hnahthial Sub Headquarters YMA hnuaiah hian Sub committee sawm (10) lai din a nih thu sawiin chung zingah chuan he coaching class buatsaihtu, Education & Youth Affairs hnuaiah hian thalaite tan hmachhawp tam tak a awm thu a sawi a. Thalai tihtur nei lo, ruihhlo khawih ta ngawt mai an tam ta chu veiawm a tih thu sawiin ruihhlo chu tumah chu tichhin ve lo turin a chah a. Exam pe tur te chu a hminga class kal mai mai lo tura chahin sawrkar chuan induhsakna tel lovin hna hi lak a tum thu a sawi a. Kalphung tharah chuan a fit leh thiam thiam bak lak an nih tawh dawn loh avangin mahni bak rin tur an awm lo a ni a ti a. He coaching class buatsaih hi hlawhtlinpui theuh turin a chah a ni.

YMA Education & Youth Affairs Secretary, Pu C. Lalhmingmuana chuan report tawi pein hetiang hun hi Hnahthialah an buatsaih vawi khatna a nih thu a tarlang a. Tun dinhmunah coaching kal tur hi mi 40 vel in register an awm tawh thu a tarlang bawk. Mathematics Society in kum tina pawl 5, pawl 8 leh pawl 12 te tana exam a buatsaih thin chu Hnahthial District-ah tun kum hian buatsaih ve a nih tur thu a tarlang a. Zirlaite tan theihtawp an chhuah zel tur thu a sawi bawk.

Coaching Class hawnna hunah hian aspirants registration ti zingah mi 20 an rawn kal a. Coaching hi vawiin tlai atangin D&M study centre, Peniel vengah neih a ni dawn a. D&M Study centre mentor, Pu VL Rohluzuala chuan D&M study centre hi February ni 23, 2025 atang khan din tan a nih thu tarlangin Constable exam turte tan March ni 7 atang khan coaching an pek tan thu a sawi a. A pangngaiin class hi thla thum (3) course a kalpui thin a nih tur thu a tarlang bawk.

Dr. K. Lalzuimawia, Chairman, E&YA Chairman chuan he coaching hawnna hun hi kaihruaiin Pu B.Lalremsanga, Secretary, Sub Hqrs YMA chuan lawmthu sawina in hun hi a khar a ni.