53/2025-2026

Saitual, the 4th April, 2025: Vawiin chawhma dar 11:00 khan DC Conference Room, Saitualah District Level Beautification Committee chu an Chairman, District Bawrhsap ni bawk, Dr. Lalngura Tlau kaihhruainain an thu khawm a, District Beautification Competition-a an project siam kalpui dan tur leh an lawmman dawn hman dan tur an rel.

He hunah hian DLBC Chairman Dr. Lalngura Tlau chuan kalkhawmte hnenah lawmthu sawiin, District Beautification Competition-ah Saitual chu chak zo lo mah se project tha tak duan a ni chu lawmawm a tih thu a sawi a, hluihlawn mai atan chuan a uiawm a ni, a ti. Dr. Lalngura Tlau chuan Saitual District chu khawpui thang zel a nih angin hmasawnna atan project tam tak kalpui mek a ni, a ti a, hmasawnna chu chak taka thleng thei a nih loh avangin dawhtheihna nen nghah a tul thin a ni, a ti. Bawrsap chuan he project hi khawtlang mipui tana tangkai leh chhen fakawm tak tur a ni tih sawiin, a tul anga hma la a, theih tawp chhuah turin kalkhawmte chu a fuih bawk a ni.

Pi Christina Lalnunfeli, SDC chuan District Beautification intihsiakna an hmachhawn dan leh District Beautification Detail Project Report (DPR) an siam chu a sawifiah a. He project ina a tum ber chu khawtlang mipui tena a tul anga hman tur hmun rem tak siam a ni a, a hmingah “Mutlipurpose Open Space” vuah niin, he hmunah hian thut thawvenna remchang tak te, tuikhuah (fountain) te leh insawizawna tur ‘open gym’ te siam a ni ang. Hei bakah hian zun in mumal tak leh lirthei dahna tur ‘garage’ solar chung nei te dah tum a ni bawk a ni.

Vawiin thutkhawmah hian “Mutlipurpose Open Space” project kalpui dan tur leh District Beautification Competition-a lawmman dawn hman dan tur rel turin sub-committee din ni se tih a ni a, Chairman atan Pu Lalthakima Chhangte, SDO (S) chu ruat niin, Member Secy atan Pu Laldinsanga Hnamte, DUDO chu ruat a ni bawk. He committee hian tul a tih angin lawmman chu District thawmthat nan leh cheimawi nan an hmang dawn a ni.

UD&PA Department buatsaih District Beautification Competition Competition hi December ni 17, 2024 khan hawn a ni a, he inelna hmang hian District tinin an khawpui cheimawina tur leh thawmthatna tur hrang hrang atan District Beautification Detail Project Report (DPR) an buatsaih a, chung ruahmanna an siamte chu February ni 27, 2025 khan thehluh niin a tuk February ni 28-ah an ruahhmanna chu sawifiah leh a ni. He inelna endik tura ruat MZU a Department of Planning and Architecture hotuten March ni 3 khan District hrang hrang tlawhin ruahhmanna an siamdan leh a tihhlawhtlin dan tur an endik a ni.

Vawiin thutkhawmah hian Dr. Lalngura Tlau, DLBC Chairman & DC, Pu Lalthakima Chhangte, SDO (S), Pu Laldinsanga Hnamte, DUDO te bakah District Level Beautification Committee member te an tel a ni.