52/2025-2026

Dated Serchhip, the 4^th April, 2025: Mizoram Sawrkar Flagship Programme Bana Kaih (Hand holding) Scheme hnuaiah Serchhip District chuan sawhthing lei leh hralh thawhhnihna - 2nd phase a kalpui tawh dawn avangin Serchhip DC Pu Paul L Khuma, Serchhip District Agriculture Marketing Committee (DAMC) Chairman ni bawk chuan vawiin khan Serchhip DC Meeting Hall ah chanchinbu mite a kawm.

Pu Paul L Khuma chuan February ni 20, 2025 atanga tanin loneitute sawhthing SCC ah phurh luh tan a ni a, Serchhip District ah hian SCC 7 awmin a thawhkhatna ah hian 1,05,000 kg zel SCC tin tan allotment pek an ni, a ti a. Sawrkarin hriatthiamna thui tak a neih avangin allotment pek zat pela sawhthing lei sak engemawzat an awm a ni, tiin, lo neitute account ah sawhthing man hi Direct Benifit Transfer hmanga pek vek an nih tawh thu a sawi bawk. Tun dinhmunah Lungpho leh Thenzawl tih loh SCC zawng zawng te hian sawhthing an hralh zo tawh a, kudam tiruak apiang te hi phase 2 ah luhpui tan nghal an ni dawn a, Serchhip SCC chuan auction hmasa ber a tichhuak tawh a ni, DC chuan a ti bawk.

2nd phase ah hian SCC te chu anmahni kea ding tura beisei an ni tawh a, DAMC in auction chhuah tawh loin SCC ten an chhuah tawh a nga, sawhthing leitu buyer pawh anmahniin an zawn a ngai tawh dawn a ni.  SCC ten sawhthing an hralhna rate a zirin sawrkarin kg ah cheng 50 a tlin lohna zat hnawhkhatin support price a pe thung tawh dawn a. SCC enkawltu leh buaipuitute hi training pek vek an ni tawh a ni.

Tun hnaia sawhthing kaihhnawiha social media-a thudik tawk lo thehdarh chungchang pawh DC chuan a sawifiah a. Zote South-ah hian mimal thahnemngaiin SCC kaltlang loin sawhthing hralhna a lo zawng a. Sawhthing chingtu dang te pawh hrilhin kg-ah Rs 22 or 23 a hralh tumin an lo cho lawk vak mai a.  Mahse buyer hian a leisak leh tak mai si loh avangin an ruahman leh beisei angin thil a kal ta lo a, harsatna an tawk ta a. Hemi chungchang hi thudik hrulah mipui ngaihdan hruai kawi zawngin video hi thehdarh a nih thu vawiin hian DC chuan a sawi a ni. 

Serchhip District SCC 7 a vawiin thlenga sawhthing hralh dan kim chang chu hetiang hi a ni.