2705/2024-2025

AIZAWL; the 26^th October, 2024: Tukin zing dar 7:00 khan MZP Gen.Hq chuan MZP Din champhaphak  pualin, “RUIHHLO-ZIRLAITE HMELMA”  tih thupuia hmangin RUIHHLO DO KAWNGZAWH a buatsaih a. Excise Minister Pu Lalnghinglova Hmar leh Education Minister Dr.Vanlalthlana ten an telpui a ni.

Aizawl khawpui chhunga School 25-a zirlai naupang ten kawng hi zawhin, Zirlai naupang te chu pawl hniha inthen in, Vanapa Hall kawta intawk khawm turin, Millennium Centre atang leh Sikulpui Kawn atangin Vannapa Hall  an pan khawm a ni. Vanapa Hall kawtah hian kharna programme hman niin, Pu C.Lalremruata, Vice President, MZP Gen.HQ chuan hun a kaihhruai a. Pu Chinkhanmanga, Gen. Secretary, MZP Gen.HQ  chuan report pein, Pu H.Lalthianghlima, President MZP Gen.HQ chuan thusawina hun a hmang a ni.

Vanapa Hall kawtah thu sawiin, Dr.Vanlalthlana chuan  ‘Mizoram hian hmelma hrang hrang kan nei e’ kan ti thin a. Kan hmelma lian ber te zinga ami chu Ruihhlo hi a ni. CYMA rorel inkhawm record, tukin zing Newspaper-a kan hmu ang khan, mithi zinga 82.54% chu mipa an ni.  Hei hian Ruihhlo in kan ram a tibuai zia a tilang chiang hle a ni, a ti.

Tui put tehkhin thu-ah hmangin, Minister chuan ruihhlo tui put tling khawm chu camping hmang te, Awareness campaign hmang te leh kawng hrangin kan rut thin a. Khawtlang, Pawl leh sawrkar pawhin a buaipui nasa thin. Mahse a lo tling khawm leh  thin a ni, tiin Minister chuan tunah chuan engah nge a putchhuahna laiah tan kan lak loh tih hi ka rilruah a lian hle a ni. A rawn putchhuahna  lai chu Middle School leh High School level zirlai naupangteah a ni, a ti.  Kohhran leh Education Dept. te pawh kan tan leh zual a ngai a ni tiin, Education dept. in Middle School zirlai naupang te chhiar duh tur zawnga  Ruihhlo chungchang te, Nun dan mawi leh tha chungchang te leh naupang siam that nana thil pawimawh dang te chu Comic bu a siam a, buatsaih mek a nih thu a tarlang bawk. Minister chuan Zirlai naupang  kalkhawm te chu  tumruhna nena zu leh ruihhlo khawih loh tura  intipaukhauh tlat turin a chah hlawm a ni.

Excise Minister Pu Lalnghinglova  chuan thu tawi te  sawiin, Yahoo leh Google indawr dan chungchang leh Yahoo in duhthlanna a hman sual te, Nokia in Android hman chungchanga duhthlanna a hman sual chungchang te chu tehkhin thu-ah hmangin, Zirlai naupang te chu ruihhlo ngawlvei nge an duh, vei loh?  tih duhthlanna chu anmahni kutah a awm a ni tiin, Pu Tetea chuan  vawiin Ni hi zirlai naupang zawng zawng tan ruihhlo chungchangah duhthlanna a hman dik tanna Ni lo ni mawlh rawh se, tiin duhsakna a hlan hlawm a ni. 

Pu C.Lalhmangaihsanga, Asst.GS, MZP Gen.HQ chuan  Vanapa Hall  kawta Ruihhlo Do Kawngzawha kalkhawm te hnenah  “RUIHHLO TI LO TURA INTIAMNA”, thutiam a laktir hnuah, Pu Zairemthanga, Treasurer, MZP Gen.HQ chuan lawmthu sawiin vawiin programme hi a khar ta a ni.