2704/2024-2025

25th October, 2024 : PHE Minister Prof. Lalnilawma chuan vawiin khan Greater Aizawl Water Supply Scheme Phase I & II Tlawng lui kama mi a tlawh a. Minister hi PHE Secretary Er. F. Liantluanga; Chief Engineer Er. Zodinthari, Superintending Engineer Er. Lalrinzuala leh department official engemaw zatin an tawiawm a ni.

Minister hian Greater Aizawl Water Supply Scheme (GAWSS) Phase-I & II hmunhma te chipchiar taka fangin tui pump dan te endik a, Tlawng lui lianin pump house a tih buai tawh lohna tura ruahmanna siam mek te a enfiah bawk a ni. PHE Department hotute chuan fur laia Tlawng lui lianin pump house  leh an hmunhma te a tihchhiat nasat vanga tui pump a khaihlak tawh loh nan pump house chhuat metre 2.7 a tih san an tum thu leh ruahmanna pawh an siam fel tawh thu minister hi lo hrilhin visual presentation an nei a, Vertical Turbine Pump pawh tuilianin a chim tawh loh nan a chhuat tih san a nih tur thu an sawi a ni.

Minister hian Aizawl chawm tura PHE Department in tui an pump dan a hmunah fang kualin changtlung zawka hmalakna tura ruahmanna kal lai mek te pawh chipchiar takin a fang a,  Dihmunzawla Dedicated Power Supply Transmission Line & 132/33 kV Substation leh Supervisory Control and Data Acquisition (SCADA) for Water Management of Aizawl GWSS Phase I & II pawh tlawhin an hnathawh dan te a endik a, SCADA enkawlna kawnga harsatna awm te a hmunah enfiahin a tul anga hma lak a nih tur thu a sawi a ni.

Prof. Lalnilawma chuan Cyclone Remal vanga Aizawl khawpui tui pek kawnga harsatna an tawh su kiang tura PHE Department a thawktute'n theihtawp an chhuah avanga lawmawm a tih thu sawiin, hetih rual hian GAWSS Phase I & II in a chawm mipuiten an harsatna tawh hrethiama dawhtheih taka an nghah avangin lawmthu a sawi bawk a, PHE Department a thawk te'n chhun zan zawmin mipuite harsatna sukiang turin tha thlah lovin hna an thawk tih a sawi bawk a ni.

PHE Department hotute chuan tun dinhmunah tui hi a pangngaiin (39 MLD per day) an pump thei tawh tih sawiin, November thla ral hma in mipuite hnenah a pangngaiin tui sem theih an inbeisei tih an sawi a ni.