MZP General Assembly Vawi 61-na chu nimin khan Mamit District, Kawrthah khuaah neih a ni, Pu TT Zothansanga Parliamentary Secretary Food & Civil Supplies, Transport, Tourism chuan khuallian niin a hmanpui.

Chawhnu vantlang inkhawm Ngurlianthanga Hall-a neihah Pu TT Zothansanga, Parliamentary Secretary, Food & Civil Supplies, Transport, Tourism chuan Zoram hmalam hun siamtha zel turin Zirlaite’n mawhphurhna sang tak kan nei tiin mizo thalai te taimakna, tumruhna leh chhelna nei tura chahin chumi tello chuan kan zirlai leh kan hmalam hun atan hlawhtlinna a awm thei dawn lo a ni a ti, MZP thiltum leh in nghahna tihlawhtling tur chuan kan zavai hian mawh kan phur a ni a ti bawk.

Khuallian chuan Tunlaiin fur ruahtui tlak lai a nih avangin, Mizoram chhung mai bakah Mamit District chhungah pawh Kawng chhiat avangin harsatna kan tawk a, heng hi kawng zau leh tha kan neih dawn avanga kawnglaih hna thawh vang a ni a, dawhthei taka nghak hram hram turin mipui te a ngen bawk.

MZP General Assembly hi chawhma-ah rorel inkhawm neih a ni a, vawiin hian a tiak ang.