MZP Hqrs. Lunglei chuan tun hnaia MPSC Combined Examination 2013-a Lunglei atanga tling thar mi 4-te lawmpuina leh chawimawina inkhawm chu vawiin khan I&PR Conference Hall, Bazar veng, Lunglei-ah an buatsaih a, Lunglei D.C. PU V.Sapchhunga, IAS chuan ‘Uaptu’ chan changin he hun hi a hmanpui a ni.

MZP Vice-President Benjamin Vanlalfela kaihhruaih inkhawmah Uaptu Lunglei DC Pu V.Sapchhunga chuan MPSC Combined Examination-ah Lunglei atangin mi 4 lai an tling chu a lawmawm hle a ni, a ti a. Lunglei tihmingthatu leh an hlawhtlinna avanga chhimlam mipuite pawh an tiphur sawta a hriat thu a sawi a ni. Sorkar hna pawimawh tak thawk tur an nih avangin ram nghahfak an ni a, an hna theuhah theihtawp chhuah turin fuihna tha tak tak leh a duhsakna sang ber a hlan bawk a ni. MZP Lunglei ten zirlaite nasa takin an fuih thinna leh zirlaite tan coaching leh inelna sang zawk an hmachhawn theihna tura hma an lak sak thinna chu fakin Pu V.Sapchhunga chuan a hma aia uar zawka zirlaite tan hemi lama Awareness Campaign buatsaih zel a tul thu leh theihtawpa a thlawp tur thu a sawi bawk.

MPSC-a tling tharte lawmna inkhawmah hian MZP Hqrs. President Eric R. Zomuanpuia leh MZP Adviser Pu H.Lalthansanga te pawhin thusawiin midangte tana entawntlak khawpa Lunglei leh chhimlam hi siam tur chuan zirlai leh thalaiten theihtawp an chhuah a pawimawhzia an tarlang a ni.

Vawiina MZP Hqrs. Lunglei ten an chawimawi te chu :

1. Carolyn Lalbiaktluangi Khiangte, MCS, Serkawn

2. Lalremruata Sailo, MCS, Thenhlum

3. C. Lalfakmawia, MPS, Rahsi Veng

4. Lalnghinglova, MF&AS, Muallianpui te an ni.