Vawiin khan Lunglei District Prohibition Committee chu an Chairman Lunglei DC Pu V.Sapchhunga hovin DC’s Conference Hall-ah an thukhawm a, kumin Krismas leh Kumthar muanawm taka hman theih nana sorkar leh khawtlang inbuatsaih dan tur an sawiho a ni.

Prohibition Committee thurel te zingah kum dang ang bawkin Lunglei khawpui chu hmun thum – North, South leh West - ah thenin sorkar officials-te kaihhruaina hnuaiah ‘Protection Squad’ ten ni 24th November leh 31 December tlai leh zanah heng hmunte hi tlawh kual nise; khawpui chhunga YMA Branch hrang hrang zana Duty-te hnenah tanpuina pek leh theihtawpa thlawp an rel bawk a. Kumhlui thlah zan 31st December-ah khawpui chhung hmun 2-ah intihhlimna buatsaih theihna turin YMA Sub Hqrs. hnena sorkar atanga tanpuina pek an rel bawk a. Committee hmingin Kohhran hrang hrang hnenah Krismas leh Kumthar hun chhunga boruak muanawm tak a awm theih nana kohhran mipuite hriat turin Appeal chhiarchhuah tur ziak nise tih an rel a. Zu emaw ruihtheihthil dangte emaw avanga khawtlang emaw inchhung emawa buaina siam chingte chu man a, Kumthar-ah chauh chhuah turin Committee chuan rawtna an siam bawk a ni.

Sorkar Dan dinglai zulzuiin Krismas leh Kumthar vuakvet laia Halpuah, halmawi leh silai lem mu nei te chu zawrh leh hralh khap tlat a ni tih mipuite hrilhrhiat uar a nih theih nan media hrang hrang te hman tangkai an rel a ni.