Vawiin khan SSA Mission, Lunglei buatsaihin Saikuti Hall-ah 'SSA Best Teacher' leh 'Best Block-wise SMC Award 2013' hlanna inkhawm neih a ni a, he hun hi Lunglei DEO Pu R.Lalthakima'n a hmanpui a ni.

Lunglei SSA Dy. DPC Pu C. Lalhmangaihzuala kaihhruai inkhawm-ah hian Pu R. Lalthakima, DEO Lunglei chuan Elementary Education tan ni chhhinchhiah tlak a nih thu a sawi a; SSA chuan thingtlang kilkhawr thlengin zirna hmasawn nan hma a la nasa hle a ni, a ti. Sorkar Laipui-in a tum ber chu rampum naupangte zirna lama tih changkan a, rampawn zirlaite elpui pha turin ruahmanna SSA chu a siam a. Mizoram pawhin SSA hi kan chhawr tangkai hle a; Mizo zirlai naupangte dawmkana tihpuitlin a, an puiltin hunah an eizawnna kawngah anmahni intodelh theih tir hi kan tum tlat a ni, a ti bawk. Zirlaite chu kan dah pawimawh hmasak chuan an zirnaah leh an thanlen dan kawng hrang hrangah hma nasa takin an sawn thei a ni tih hre reng turin DEO chuan zirtirtute a chah a ni.

Vawiin inkhawmah hian Pu R. Laldawngliana, DPC chuan Rev. Killuaia phuah “Mizo Naupang” tih music video a tlangzarh bawk a ni. 'SSA Best Teacher Award 2013' chu Pu Darkhuma, Headmaster, Haulawng Govt. P/S -IV hnenah hlan a ni a, hei hian Citation leh Rs. 10,000/- a keng tel a ni.

'Block-wise SMC Award 2013' dawngtute chu - New Khawlek UPS Bunghmun Block, Khawhri Govt. P/S Eastern Block, Thualthu Govt.P/S Station Block leh Zodin M/S Tlabung Block te an ni a; Citation leh Rs. 5000/- theuh an dawng a ni.