MZP Headquarters Mamit buatsaihin vawiin khan BRC Hall, Mamit-ah kum 2015 HSLC & HSSLC result tihchhuah taka pass thar te lawmpuina leh Career Guidance & Counselling neih a ni a, Pu Vanlalngaihsaka, District Bawrhsap chuan he hun hi a hmanpui.
District Bawrhsap chuan Zirlai hlawhtlinna chang zawng zawngte a lawmpui thu sawiin, zirlaite chu an kal leh zelna turah duhsakna a hlan a. Zirlaite chu hmalam hun thlir thiam tur leh rilru sang tak pu turin a fuih a. Pu Vanlalngaihsaka chuan Central Service-ah mizo lut an tlem tawh tih sawiin zirlaite chu Central Service lama lut thei tura tun atanga tan la turin a fuih bawk.
He hunah hian zirlai ten hmathlir mumal tak nei a zirna an chhunzawm theih nan Career Guidance & Counselling neih a ni a, Arts, Science, leh Commerce subject-a mithiam bik ten zirlaite hrilhfiahna hun neiin inkawmhona hun tha tak hman zui a ni.
