HSSLC Examinations, 2015 results chungchangah Mizoram Board of School Education chuan a hnuai ami ang hian thuchhuah an siam:
Higher Secondary School Leaving Certificate (HSSLC) Examination, 2015 Results ni 8, May, 2015-a Mizoram Board of School Education (MBSE)-in a tihchhuahah khan Mizo Students Union chuan results dik tawk lo a awm nia an hriat thu chanchinbu thenkhatah a lo lang a. Hemi chungchanga thil awm dan dik tak chu hetiang hi a ni e.
HSSLC Examination, 2015-a results hi dik lo emaw tihsual emaw a awm lo a. Candidate-te mark hmuh hi tabulation sheet-ah dik takin ziah luh vek a ni a. Chu database hmang chuan marksheet pawh dik taka print chhuah vek a ni a. Aizawl khawpui chhunga HSSLC Examination Centre zawng zawng leh khawpui pawn centre eng emaw zat pawhin result tihchhuah ni la la khan an la chhuak vek hman a. Tin, Lunglei, Lawngtlai leh Saiha districts chhunga candidate-te marksheet pawh thawnchhuah vek hman a ni.
MBSE chuan candidate-ten an result rang zawka an lo hmuh theihna tur atan results chhuah rual rualin MBSE website-ah results hi a dah ve nghal thin a. Amaherawhchu immediate information tur chauha duan a nih avangin “disclaimer” siamin Board certificate/marksheet chauh rin tur a nih thu tarlan a ni a. Results dik lo awm anga lo lang ta pawh hi website-a tihchhuahah chauh hian a ni a. Results database (original tabulation) atanga excel file format-a convert a nihna lamah candidate thenkhat (a bikin Commerce stream leh Science stream) subject mal hrang hranga an mark hmuh zat bik chu a lo tawlh danglam hlauh mai a. Chutih rualin an roll no te leh an hming te total mark leh an division, an particulars dang zawng erawh chu a che sawn ve lo a. Hetiang a lo nih tak avang hian subject mal hrang hranga an mark hmuh zat ber a lo tawlh sawn tawh avangin pass kim lo te chu pass kim ang ten a lo lang ta a. Mark hmuh zawng zawng belhkhawmte pawh chu an mark hmuh belh khawm dik tak tarlan nen chuan a inmil thei ta lo bawk a, hemi avang hian candidate failed thenkhatte chu passed tur niawm tak ten a lo lang ta a ni.
Tin, practical awmna subject reng rengah hian theory leh practical-ah a hrang ve vea pass mark hmuh ngai a ni vek a. Candidate thenkhat chuan theory emawa pass mark hmu pha si lo chung khan an practical mark nena belhin pass phaah an inngai ta thin a. Hetiang case hi chu hriatsual vang liau liau a ni e.
Sawi tawh angin HSSLC Examination, 2015 results hrim hrimah chuan dik lo a awm hriat a ni lo a. Amaherawhchu Internet lama website-a tarchhuah chu a lo dik lo palh hlauh zawk a lo ni a. Website-a tarchhuah a dik lo a ni tih hriat a nih veleh (chu chu Results chhuah ni tlai lam) MBSE website-a results dik lo awm chu tihtawp nghal a ni a. Database’ dik (original tabulation) atangin result dik tak chu lakchhuah leh nghal niin MBSE website-ah pawh result chhuah ni tlai lam dar 5:40 velah chuan a duh apiang tan en theihin tihchhuah leh nghal a ni a, tun thleng hian en theihin a la awm reng a ni.
Results dik taka siam leh tihchhuah a nih laia website lama hun eng emaw chhung te candidate thenkhat subject mal hrang hranga an mark hmuh zat dik lo tar chhuah palh a ni hi Mizoram Board of School Education chuan pawi a tiin thupha a chawi a. Chutih rualin website-ah hun eng emaw chhung te dik tawk loa tarlan palh a ni tih loh chu HSSLC Examination results-ah hian dik lo leh rinhlelh tur eng mah a awm lo a, an mark dik tak chuanna original marksheet pawh anmahni theuh Centre/School atangin a lam theih reng a ni.
