Mizoram Sorkar-a ‘State Level Committee on Slaughter House’ Member te chuan an chairman Dr. C. Vanlalramsanga, UD&PA Department Secretary hovin May 8, 2015 (Zirtawpni) 8.00 p.m. khan Mualpui-a AH&Vety Department enkawl mek Slaughter House chu a hmunah tlawhin an hnathawh dan an enfiah. Hetah hian SLC Member Pu Zorammuana, Director UD&PA, Dr. L.B. Sailo, AH&Vety Director leh UD&PA leh AH&Vety Department officer te, AMC Officer te leh Mizoram Pollution Control Board officer te an tel.
Mualpui-a Slaughter House ah hian Inrinni a bazaar hmun hrang hranga zawrh chhuah tur bawng 70 bawr vel hi Zirtawpni zanah talh ziah thin a ni a, zankhuaa talh thin a ni. Hetah hian thianghlim leh dan ina a phut anga ransa ten na an tuar lo thei ang ber tura talh thin a ni. SLC Member te hi sa talh lai leh sawngbawl dan te entir a ni. Vety Department hian Meat Inspector neiin sa te hi endik zelin certificate fel tak nen heta sa talh te hi an pe chhuak zel a ni. Bawng bakah hian vawk talhna te entirin Department in Aizawl hmun hrang hrang-a Meat Shop a neiha hralh chhuah tur thianghlim taka vawk an talh dan te sawifiah a ni bawk.
Ransa te mihring ei-tura talh leh sa leh a tawphnawk sawngbawl chung changah hian Supreme Court chun WP (C) 330/2001 (Common Cause vs Union of India) WP (C) 309 of 2003 (Laxmi Narain Modi vs Union of India 8b Ors) ah te ransa talhna thli fel taka sawngbawl tur leh leh ransa te talh dan tur kalphung te zawm turin a siam a. Chumi ang zulzuia Mizoram khawpui hmun hrang hranga Slaughter House te pawh kalpui a nih theihna turin State Level Committee hi Supreme Court thupek angin din a ni.
State Level Committee hian Aizawl khawpui leh Mizoram chhunga khawpui danga sa talh dan leh sawngbawl dan te uluk taka en chhoh zel turin hma a la a. Mualpui-a AH&Vety Department enkawl lai chu sa talh kawnga thianghlim leh felfai taka kalpui a ni chu SLC Member ten lawmawm an ti hle a. He Slaughter House ina mamawh a neih hrang hrang te en nghalin a tul anga hmalak dan tur te an en nghal a. Brigade Area a Slaughter House sak tan chhoh mek anih thu leh District khawpui hrang hranga hma lak chhoh dan te Vety Department hotute hian an lo hrilh bawk a ni.
