Vawiin khan Beraw Tlanga Mizoram Science Centre hmunah Directorate of Science & Technology, Planning & Programme Implementation Department buatsaih National Technology Day lawmna hun chu Planning Minister Pu Lalsawta’n a hman pui a, Innovation Hub leh Astronomy & Space Science Exposition Theater Building lungphum a phum. He hunah hian Kolkata-a National Council of Science Museum Director General Pu GS Rautela chu khual zahawm niin Fun Science Extension Gallery a hawng nghal a ni.

Pu Lalsawta chuan science leh technology hi mihring hriselna kawngah te, zirna kawngah te, ei leh bar zawnna kawngah te, ram rorelna kawng thlengin a tangkai a, kawng tinrenga khawvel mamawh phuhruk turin a tangkai a ni, a ti. Minister chuan Mizo thalaite chu khawvel hmun danga mite aiin an hniam bik lova, India ram leh khawvel huap pawha scientist tha an nih theih ngei a beisei thu a sawi a. Beraw tlanga Science Center awm mek leh Innovation Hub sak mai tur chu Mizo thalaite tana tangkai tak a nih ngei a beisei thu sawiin khawvel ram dang thlir chungin chona lian tak an hmabak mek a ni, a ti.

Khual zahawm Pu GS Rautela pawhin Mizorama Science and Technology Department hmalakna leh hmachhawpte lungawithlak a tih thu leh Science Centre pawh phuisui zawka thuam that zel theih a nih tur thu a sawi a. Hmasawnna hi science thiamnaa innghat vek a nih avangin tan la sauh sauh turin kalkhawmte a sawm a ni.

Innovation Hub leh Planetarium sakna atan hian Rs 2.73 crore ruahman a ni a. Hnathawh bul tan nan cheng nuai 81 hmuh tawh niin thla 18 chhunga peihfel tur a ni a. A chhawng chung zawkah Digital Planetarium dah a ni ang a, a hnuaiah Innovation Hub a awm ang. Innovation Hub hi naupangte fuihtu, science thiamna leh technology lama tuina siamsak tu, text book-a an thil zir a taka an hman theihna tur leh thil thar ngaihtuah chhuak thei tura puitu tangkai tak tur a ni a. A chhungah hian Discovery Hall, Innovation Resource Centre and Hall of Fame, Idea lab leh Design Studio a awm ang. Digital Planetarium hi mi 55 vel thut theihna tura ruahman a ni a, space leh astronomy show en tur a awm dawn a ni.

Lungphum phumna leh Technology Day lawmna inkhawm hi Planning Secretary Pu C.Vanlalramsanga’n a kaihruai a. Chief Scientific Officer Dr RK Lallianthanga’n kalkhawmte lawmna thu a sawi a, PWD Project Division-I EE Pu H.Zoramliana’n tecnical report a pe a, Senior Scientific Officer Dr Lalnunsiama Colney chuan lawmthu sawiin hun hnung a khar a ni.