Vawiin khan Champhai District Superintendent of Police Pu RP Meena, IPS chuan MJA Champhai District Hqrs leh Champhaia tlawmngai pawlte inkawmhona a neihpui.
Champhai SP Pu RP Meena chuan kalkhawm tlawmngai pawlte chu dan leh thupek kenkawh kawngah hmalakpuiah sawmin, khawtlanga remna leh muanna a awm theihna atan te, dan leh thupek kengkawhtute leh mipui inkarah thawhhona tha a awm theihna turin thawhpuiah a sawm a ni.
He hunah hian kalkhawmte chuan Champhai District chhunga dan leh thupek kenkawh kawnga hmalakna tur an hriatte tarlangin Champhai khawpui chhunga ruihhlo chetvelna hmun bik a hriatah te police duty a tam thei ang bera dah tul an tih thu te, Parking fee khawn chungchang te, Gutkha leh a kaihhnawih dan khuahkhirhna chungchanga hmalak dan tur te leh, Myanmar lirthei, India ram chhunga danin a phal chin bak an rawn kal thin tihtawp dan tur chungchangte SP hnenah hian an thlen a ni.
Vawiin inkawmhonaah hian MJA Champhai District Hqrs bakah Champhai Sub-Hqrs YMA, YMA branch hrang hrang, NGO Coordination Committee, MUP leh MHIP aiawh mi 23 an tel thei a ni.
