Vawiin khan Mizoram State Rural Livelihoods Mission (MzSRLM) Governing Body Meeting vawi 5-na chu Secretariat Conference Hall-ah Rural Development Minister, Pu R. Lalzirliana hovin sorkar mi pawimawh, NABARD leh MZU aiawhten an nei.
Meeting kaihruaitu RD Minister, Pu R. Lalzirliana chuan thingtlang mite tana an eizawnna nghelnghet siamna tura sorkar laipui atanga duan, he Mission hian Mizoramah kum khat hmel a hmu tawh a. He Mission hnuaia sum ruahman hrang hrang lokal te chu dik taka hmanga, a chhawrtu turten chhenfakawm taka an chan theihna turin a thawktuten langtlang leh fel fai taka an thawh a tul a ni, a ti.
Vawiin meeting-ah hian kum kal ta chhunga an hmalaknate thlirho a ni a, kum kal mek, 2013-2014 chhunga hmachhawpte chipchiar takin an sawiho bawk. Thurel pawimawh tak takte zingah, NRLM hna enkawl tur hian state dangah pawh an lo tih thin angin DRDA chu District Mission Management Unit anga mawhphurna pek chungchangte; District tina NRLM Committee din dan te bakah Block huamchinna Self Help Group leh Bank indawr kawnga tanpuitu tur (Bank Mitra) ruat chungchangte a tel a. MZU-in he Mission atan thil tangkai zirchianna an kalpui mek leh an thlen chin te pawh vawiin meeting-ah hian sawi lan a ni bawk.
He Mission hnuaiah hian Kolasib leh Serchhip District-a RD Block pali te chu Intensive Block-ah dah an ni a, a tahtawlin Mizoram pum hi la tuamchhuah tum a ni.
