No.7809/2020-2021

Dated Khawzawl 16th March, 2021 : Mizoram State Rural Livelihood Mission (MZSRLM) Khawzawl Block Management Unit leh Krishi Vigyan Kendra (KVK), Khawzawl tangkawpin vawiin khan Khawzawl RD Block huamchhunga khaw 15 a leilet neitu mi 115 te hnenah Self Help Group kaltlangin leilet buh chi tha Pusha Sugandh (PS)-5 an sem chhuaka, training neih chhunzawm nghal a ni. He hun KVK Khawzawl Pisa tuala neih hi Pu Lalrohlua, Addl. D.C. Khawzawl District chuan khuallian niin a telpui a ni. 

Leilet buh chi tha PS-5 sem chhuahna puala inkhawm tawi Pi Lalrammuani, Block Mission Manager kaihhruaia neihah khuallian Pu Lalrohlua chuan retheihna umbona atan leh eizawnna siamna atan Self Help Group kalphung chu India ram chhung mai bakah Agency liante pawhin an hmang nasa tih a sawi a. MZSRLM kalpui a nih hnuah SHG chu khaw hrang hrangah nung taka kalpui a nih thu sawiin, Block Mission Management Unit-te an tha tawka, Bank atanga a hlawma Credit hmuh theihte nasa takin a punga, hma kan sawn hle a ni, a ti a. Khuallian chuan SHG Member kalkhawmte chu hlawhtlinna chang tura theihtawp chhuah turin a chah a, thil hrang hrang bawh tumnaah chetsual palh a hlauhawm tih sawiin hmalakna tura an lo thlan tawhah insawr bing turin a chah a. India sawrkarin retheite umbona  atan leh eizawnna siamna atana tha a tih SHG hi Mizoram-ah pawh kan tuai nuna kan tih vul zel chuan ram leh hnam, chhungkaw tan hmasawnna a thlen ngei a ring tih a sawi a ni. 

He hunah hian KVK Khawzawl Head & Senior Scientist, Dr. Henry Saplalrinliana chuan SHG Member, leilet nei kalkhawmte hnenah an buh chi sem chhuah tur PS-5 kui tiah dan leh enkawl dan turte hrilhhriatna a nei bawk a, hemi hnu hian leilet neitute hnenah khuallianin buh chi te hi a hlana, buh chi hi mi pakhat tan Kg. 2 zela sem chhuah a ni. 

Vawiina leilet neitute hnena buh chi tha an sem chhuah PS-5 hi KVK Khawzawlin leilet neitute chin pun tura Indian Agriculture Research Institute (ICAR), Pusa, New Delhi atanga an lak chhuah a ni a. Khawzawl RD Block huamchhunga khaw 15 - Pamchung, Chawngtlai, Sialhawk, Tualte, Tlangmawi, Tlangpui, Vankal, Vangtlang, Rabung, Puilo, Chhawrtui, Kawlkulh, Neihdawn, Arro leh Hmuncheng khuaa SHG te kaltlangin leilet nei mi 115 in an ching dawna, buh chi an sem rual hian loneitu mi 111 hnenah Spinach (Palak) chi sem chhuah a ni bawk.