No.7808/2020-2021

Dated Aizawl, the 16th March, 2021: India rama ei leh in siamchhuah leh zawrh lama thuneitu sang ber FSSAI hotu Chairperson Ms.Rita Teaotia, IAS (Rtd) leh Mr Arun Singhal, IAS, Chief Executive Officer-te chuan vawiin chawhma dar 9:00 khan Dr.R. Lalthangliana, Health Minister a Office-ah an kawm a. Mizorama Food Safety tihhmasawnna tur kawng hrang hrang leh, Food Testing Laboratory changtlung zawk neih a nih theih dan tur kawngte an sawipui.

Health Minister Dr.R.Lalthangliana chuan FSSAI hotu sangte hi lo lawmin, an thahnemngaihna fakawm a tihzia a sawi a. An thahnemngaihna chuan rah tha tak a chhuah ngei ang tih a beisei thu leh, nasa zawka tan la a, ei leh in thianghlimna kawnga FSSAI hmalakna theihtawpa thlawpa tan lak zel a nih tur thu a lo hrilh a ni.

FSSAI hian India ram pumah ei leh in thianghlimna kawnga hmasawnna turin nasa takin beihpui a thlak mek a. State/UT tan tanpuina pawisa leh Food testing equipments a pe nasa a, Food Testing Laboratory tam zawk leh changtlung zawk dinna turin hma a la nasa em em a ni. A bikin Infrastructure nei tha lo State-te dawmkanna kawngah hma a la nasa zual a. Mizoram Food Safety Eco-System tihchangtlunna tur pawhin FSSAI leh Mizoram sawrkar indawrna a kal mek a.  Chumi atan chuan MoU siam mek a ni a, a hlawhtlin hunah chuan Mizoram Food Safety pawhin hmasawnna nasa tak a nei ngei dawn a ni.

FSSAI hotute hian state sawrkar hotu dangte Food Safety chungchangah an kawm bawk a ni.