No.2262/2021-2022

Aizawl, the 17th September, 2021: Inhmelhriatna tha zawk leh hmalaknate inhriatpuitawn a nih theih nan leh, Champhai District tihhmasawn kawnga tulte buaipui kawnga pheikhai rual zawka thawhho a nih theih nana 'One Day NGO Meet', NABARD, Mizoram Regional Office buatsaih chu vawiin chawhma khan District Bawrhsap Pi Maria C.T Zuali chuan khuallian niin a hmanpui.

Pi Maria C.T Zuali chuan thingtlang a chengte leh kuthnathawktute tihhmasawn kawnga thawktu NGO hrang hrangte nena inkawmhona hun tha tak buatsaih ani chu lawmawm a tih thu sawiin, thingtlanga chengte tih hmasawn kawnga tanpui duhna thinlung an pu chu fakawm a ti a. Kalphung panggai renga kal lova thil thar leh tha zawk zawn chhuah kawnga tanlak a tul thu sawiin, NGO te chu NABARD kaltlanga project siam theih hrang hrangte zirchianga district chhunga kalpui thei tura theihtawp chhuah turin a sawm a. Champhai District chhunga sa leh thlai dehchhuah tam tak awmte thiamna hmanga sawngbawl hnua hralh theih dan turte ngaihtuahpui turin a sawm bawk.

NGO hotute chu mahni awm hmun atanga hna thawk mai lova loneitute kalchilha an dinhmunte zirchiang tur leh, thar chhuah hlawk zawk nei thei tura tanpui inhuam theuh turin a fuih a. An hnathawh leh kalzelna kawngah duhsakna hlanin Champhai District chu an tan a inhawn reng thu leh thawhhopui turin a inpeih reng thu a hrilh a ni.

Pi H.Lalhmachhuani, DDM, NABARD Champhai chuan kalkhawmte lawmna thu a sawi hnuah NABARD awmzia leh kalphung hrang hrangte powerpoint presentation hmangin a sawifiah a. NGO te nena thiamthil zir kawnga thawhdunnate, LEDP/MEDP, Cluster Development, Horticulture kaihhnawih project kalpuite bakah FPO, SHG/JLG/FC leh RIPF chawikanna kawnga hmalaknate a tarlang bawk.

DDM, NABARD Champhai chuan thingtlang tihhmasawn kawnga NGO te phur tak leh rilru zau tak pua an thawkchhuak thin chu fakawm a tih thu sawiin, NGO ten thingtlang hmasawnna leh leirem an rahna tura an hnathawh hrang hrangte a tarlang bawk.

NGO aiawhin Pu Mark Lalduhsaka, CEO, Angel Business Promoters of Mizoram leh Pu B.Lalrinkima, State Programme Co-ordinator, NEIDA te hnen atangin an pawl hnathawh leh hmalak dante bakah, hmachhawp an neih hrang hrangte ngaihthlak a ni bawk.

NABARD chuan Mizoram State chhunga hmasawnna hnathawh hrang hrang atan NGO te kaltlangin tanpuina hetiang hian a pe chhuak tawh a ni:
1) Farm Sector Promotion Fund kaltlangin cheng nuai 286.920
2) Tribal Development Fund kaltlangin cheng nuai 1490.131
3) Formation of FPO kaltlangin cheng nuai 227.420
4) Springshed Project kaltlangin cheng nuai 131.230, avaiin cheng nuai 2135.701 a tling tawh a ni.

He hunah hian kuthnathawktute puih theih dan tur hrang hrang funding, training leh market zawn sak hna leh, anmahni tuaihriam tura thiamna pek theih dan turte ngaihtuahho a ni a. Entrepreneurship Development Program kaltlanga ei leh in sawngbawlna food processing training pek theih dan turte bakah Champhai District chhunga ran, thei leh thlai tha duh leh sawngbawl theih turte tangkai taka hman a nih theih dan turte pawh sawiho a ni bawk.