Naktuk March ni 4 khian zing dar 11:00 atangin Tumpui Khelmual-ah ropui takin Chapchar Kut 2016 lawm a ni dawn. Chapchar Kut 2016 lawmnaah hian Horticulture, LAD leh Social Welfare Department enkawltu Minister Pu P.C. Lalthanliana chu Kut Pa tura beisei niin Kolasib Bawrhsap Pu H. Lalengmawia, IAS chu Kut Thlengtu a ni ang.

Chapchar Kut 2016 Organizing Committee chuan District mipui zawng zawng te he hunah hian tel vek tura sawmin a kal tur te chu Mizo incheina a inthuam turin a ngen a. Programme hlimawm tak leh mittlung tak buatsaih a ni ang a, Programme ah hian Mizo hnam lam chi hrang hrang, Mizo incheina te bakah malzai te chhawpchhuah a ni dawn a. MJA Kolasib District leh ZOOM tangkawp ten thlalak phochhuahna an nei dawn bawk a ni.

Chawhnu lamah Mizorama zaithiam rualin Rimawi Hunpui neiin zaiin mipui an awi ang a. He hunah hian 500 Band, Blue Mountain, Andrew Laltlankima, Christy Zaithanchhungi, DJ Lalvenhimi, Enkawli Pautu, Grace Lalchhanhimi, H. Lalthakima, Laithangpuii, Lalbiakfeli, Lalbiakchhungi leh midangten hun an hmang ang.

Chapchar Kut 2016 denchhenin District mipui zawng zawngte chu mahni in leh a chhehvel tifai tura ngen leh hriattir an ni bawk.