Vawiin khan RTP Cinema Hall, Bazar Veng, Lunglei-ah Sports & Youth Services Football Academy 1st Annual Closing Function neih a ni a. SYS Football Academy Warden-cum-Coach Pu R.Lalmuankima-in inkhawm a kaihruai a, Khuallian Pu Chalrosanga Ralte, MLA Lunglei 'W' chuan he hunah hian Academy atanga zirchhuakte hnenah Certificate a hlan nghal a ni.

Khuallian chuan SYS Football academy atanga result tha tak nena chhuak zawng zawngte a lawmpui thu a sawi a; football bikah hlawhtling tur chuan insumtheihna leh thuawihna a pawimawh hle thu a sawi a. SYS Football Academy-a lutte chuan mahni kum dik tak (Under-17) an ziah vek avangin lut thar turte tan an entawntlak a ni tih sawiin Pu Chalrosanga chuan infiamna hmasawn tur chuan Academy tha neih a ngai a, chuvangin Sawrkarin thalaite hmakhua ngaiin Zobawk Sports Complex chu chak takin a sa chho mek a ni, a ti.

SYS Jt.Director Pu J.Vansangzuala chuan report pein Mizo naupang football tui mi ten hma an sawn theih nan kum 2008 atang khan Directorate Of Sports & Youth Services Department chuan Saidan, Kolasib-ah Sport Training Centre a din tawh a, mipa naupang 22 dahin NIS qualified coach ten training an pe reng a, he centre-a naupangte hian a din tirh atanga tun thlengin Mizoram school aiawhin Subroto Cup, New Delhi-ah an zu khel thin a. He center atanga chhuakte enkawl zui nan Non-Residential coaching chhunzawmin SYS Football Club din a ni tih a tarlang a. Lunglei-ah ngei Under-17 Academy din rawtna thlen chu Director, S&YS-in a lo tih puitlin sak a, nikum 10th April atang khan RTP Hall-ah 1st Batch naupang 20 hmun hrang hrang atangin training an nei tan a, a tum khatna atan September 2015 khan Mizoram school Under-17 aiawhin Govt. Bazar Veng High School hmingin 56th Subroto Cup an zu khel tawh tih a tarlang bawk.

Vawiina Closing Funcion-ah hian LDSC Fin. Secy Pu Lalchhuanawma Chhakchhuak, LDFA President Pu Lawmawma Tochhawng leh MJA Lunglei President Pu Lianchama Chhangte ten fuihna thu an sawi bawk.