Vawiin khan Govt. Lunglei College, Lunglei-ah ‘ One Day Sensitization Workshop on Rashtriya Uchchatar Shiksha Abhiyan (RUSA)’ neih a ni a. Workshop hawnna inkhawm hi Lunglei DC Pu Abhijit Vijay Chaudhari-in a hmanpui a; Addl. State Project Coordinator (RUSA) Prof.K.L.Pradhan chu Resource Person niin RUSA chungchang sawizauna hun a hmang.

RUSA Workshop hawnna inkhawm Pi Lalhmangaihi Hrahsel, Principal, Lunglei Govt. College kaihhruaiah Lunglei DC Pu Abhijit Chaudhari chuan Board of Governors (RUSA ) Chairman a nihna angin Lunglei-ah ngei RUSA chungchanga zirhona hun tha buatsaih a nih theih avangin lawmthu a sawi a. Rampuma zirna sang zawk (higher education) hmasawn nana Sorkar Laipuiin a ruahman RUSA hi Ministry of Human Resources Development hnuaiah enkawl mek niin a tum ber chu state hrang hranga College leh University te thawmthat leh zirna tha leh belhtlak siam a ni a. Ramchhung State/UT dangte chuan 60:40 ratio-in sorkar laipui nen sum an intum sem laiin, hmarchhak state leh Jammu & Kashmir-te chu ‘Special Category States’ tiin Central-State share chu 90:10 a ni thung tih tarlangin Pu Abhijit Chaudhari chuan RUSA kaltlanga sorkar hmalakna hi bawhzui chak a, theihtawpa thlawp a nih chuan Lunglei-a zirna In hrang hrangte chu nasa takin hma an sawn ngei a beisei thu a sawi bawk.

Lunglei Govt. College Principal Pi Lalhmangaihi Hrahsel chuan an College mamawh thil hrang hrangte RUSA kaltlanga pek an nih chungchangah lawmthu a sawi a. Vawiina Resource Person Prof.K.L.Pradhan chuan state zirna tihhmasawn nana RUSA kalpui dan turte sawifiahin Workshop-a tel college zirtirtute, zirlai pawl hruaitute leh NGO aiawhte nen sawihona hun hman zui a ni.