Vawiin khan Industries Department changtu Parliamentary Secretary Pu Joseph Lalhimpuia chuan Horticulture Department Conference Hall-ah Lean Manufacturing chungchang inzirtirna hun a hmanpui.

Khual zahawm Pu Joseph Lalhimpuia chuan hautak lo, tlo leh hlawk zawk sia thil siam chhuah dan inzirtirna (Awareness Programme on Lean Manufacturing) buatsaih a ni chu lawmawm a tih thu a sawi a. Thil siam chhuah lama hma sawn zel turin Industries Department-in theihtawp a chhuah mek thu leh Central Scheme la hai chhuah loh hrang hrang hai chhuak turin a changtu Minister hova hma an lak mek thu a sawi. Parliamentary Secretary chuan Myanmar-ah mipui thlan sorkar a din tan avangin Mizoram-a hnathawk tam tak an haw chho tan a, puan tah leh thil siam chi hrang hrangah a ram mi ngeite thawk thei tura inbuatsaih a ngai a ni, a ti a. Sawrkar atanga tanpuina beisei ringawt lo va, thawh chhuah hmuh tlak nei tura lang tlang leh rinawm taka thawk turin Industry neitute chu ngenin, ram chhunga thing leh mau te tangkai zawka hmang a, Mizo puan hmang te pawha thil siam uar turin a chah a. Training hlawk tak nei turin duhsakna a hlan nghal bawk.

He ni khat awh Awareness Programme hi Mizoram sawrkar hnuaia Bamboo Development Agency (BDA) leh Quality Council of India tang kawp buatsaih niin, BDA General Manager Pu Lalzarliana Hrahsel chuan a kaihruai a. National Accreditation Board for Education Training (NABET)-a Executive Officer (Trainee) Pu Kamakhya Basumatary-a chu resource person niin; tul lova hun, sum leh tha sen titlem a, Micro, Small leh Medium Industry-te hlawk zawka kalpui theih dan tur chungchang a zirtir a. He hunah hian Mizorama industrialist leh entrepreneur sawm bik mi 30 vel an tel a ni.

Lean manufacturing hian a tum chu thil siam chhuah kawnga thil tul lo, hun tihektu zawn chhuah a, hun rei lo zawk chhunga product quality tha zawk siam chhuah theih a ni a. Sawrkar laipui Micro, Small & Medium Enterprises chuan Lean manufacturing pawimawhzia hriain, National Manufacturing Competitiveness Programme hnuaiah Lean Manufacturing Competitiveness Scheme a duang a. He scheme atan hian NABET, Quality council of India chu Implementing Agency an ni. He scheme hian Rs nuai 30 (80% of total project cost) thleng consultant rawih man a tum thei a. A dang 20% erawh chu a ruaitu emaw state sorkar emaw tum tur a ni thung.