Vawiin khan India ram pumpuiah kumdang ang bawkin, India Prime Minister hmasaber, Pandit Jawaharlal Nehru piancham denchhenin 'Naupangte Ni' hman a ni. Aizawlah pawh  he ni pual hian Mizoram Governor Kummanam Rajasekharan chuan Raj Bhawan Multipurpose Hall-ah sikul naupte nen inkawmna hun a buatsaih a. He ni lawm tura lo kal, Sikul naupangte chu Governor chuan  thingpui ruai buatsaih sakin Raj Bhavan chhunga hmun hrang hrangte fang kual turin a sawm a. Nakum atangin, state pum huap leh District pakhat theuh huapa ' Best Child' a thlanchhuahte chu  kum tin atan, Governor's Trophy hlan an nih thin tur thu Governor chuan a puang nghal bawk a ni.

Children's Day 2018 pualin Mizoram Governor Kummanam Rajasekharan chuan Mizoram chhunga naupang zawng zawngte chu duhsakna chibai a buk a. He ni puala thuchah sawiin  Naupanlai  chuan    suangtuahna hrang hrang leh puitlin huna nihtum hrang hrangten rilru a luah khat thin tih a sawi a. Mi hlawhtling ni tur chuan  ngaihtuah tam a ngai a. Naupang lai atangin suangtuahna ropui tak tak leh tum sang tak tak neih a pawimawh hle a ni a ti. "Zirlai hun hi hman thiam a ngai a. Tan lak hun a nih angin rim taka hnathawk thin te chu mi puitling,  mi hlawhtling tak tak te an thin a. Mi hlawhchham te hi kan belhchian chuan harsatna paltlang ngamlo te, vawihnih khat tihfuh loh avanga beidawng thin te leh an thil tum sawi hnawm sak thintute awka ngai thutaka  thutlukna fuhlo tak siam thintute an ni tlangpui a ni", a ti. Zirlai leh naupangte chu ram leh hnam nghahfak an nih bakah ram leh leilung hausakna tinrengte la rochungtu tur te an ni a. Chuvangin, tuna naupang ni mek te chu roluahtute an la nih dawn avangin ramngaw, nungcha  leh leilung humhalh pawimawh hre  chunga an than chhoh zel a pawimawh tak zet a ni a ti a. Governor chuan Naupangte Ni pual hian naupang zawng zawngte   chu nungchang mawi, hriselna,  zirna ngai pawimawh tur  leh humhalhtu rilru pu tel turin a chah a ni.

Children's Day 2018 puala naupangte leh Governor inkawmna hunah hian Aizawl khawpui chhunga Sawrkar Middle Sikul  10 - Kulikawn, Salem, Sikulpuikawn - Mission Veng, Chaltlang, ITI, Bawngkawn, Electric Veng, Chanmari, Mission Vengthlang leh Lawipu atang te in an tel a ni. Sikul 10 aiawh theuh te chuan  Governor hnenah hian zawhna pakhat theuh an zawt a. Mizoram nuam i ti em? Mizo mipuite engtin nge i hmuhdan?, Lehkha i zirchhungin eng subject nge i ngainat ber?,Eng hi nge Mizoramah zirna hmasawn zel na atan pawimawh ta ber ang?, Mizoram mipui ten engtia hriat reng che nge i duh ber?,  Eng hi nge kan sikul te tihhmasawnna atan pawimawh ang? Eng thil nge i hunawl hnawhkhah nan nuam i tih ber?, Eng ni Kerela thil chin tha tak Mizoramah pawh tih ve ni se i duh deuh a awm em? tih leh I pian leh murna min hrilh thei em? Kerela-ah Kristian te engzah bawr vel nge awm ve? tih te an zawt a ni.  Naupangte zawhna hrang hrang te chu Governor chuan phur takin a chhang a. A pianna khua chu Kerela State chhunga district lian lemlo tak pakhata thingtlang khua, Kummanam a ni tih leh a pianna khaw hming chawia a hming pawh phuah a ni a ti. Governor chuan Mizoram leh Kerela chu a ram hmelhmangte pawh a inang hle a, a chhunga chengte an inngaitlawmin an ngainatawm hle a ni a ti a. Lehkha  a zirlai chuan Mathematics subject a thiam theih thin thu a sawi a. Zirna bakah tualchhung, state chhung leh ramchhung thil thlengte, mipuiin enge an duh tih te, mipuiin enge an mamawh tih te chanchinbu leh magazine atanga hriat tum ve thin te a tangkai tih a sawi a. Sikul naupang tan pawh chanchinbu chhiar tam a pawimawh hle a ni a ti. Mizoram-ah zirna sikul tam takah science zir theihna a awm tam a pawimawh hle a ni tih a sawi a; science subject-ah naupangte chawhphur chu Mizoram Education Department thuneitute chuan ngai pawimawh leh zual se a tha hle ang a ti. Thalaite leh chhungkaw intihhlimna atan Cinema Hall te Mizoramah pakhatmah a awm lo chu pawi a tih thu sawiin Mizoram chu Film Industry dinna hmun atana hmun remchang ber pawl a ni a ti.

Children's Day Celebration 2018  programme, Raj Bhavan a neih hi Secretary to Governor Pu K. Lalthawmmawia'n  a kaihruai a. Programme buatsaih a nih dan leh naupang fuihna thuchah tawi Pi Esther Lalruakimi, Commissioner & Secretary, School Education chuan a kaihruai a ni. Children's Day 2018 chhimtute pual hian Governor chuan thingpui ruai a buatsaih a. Governor chuan Sikul naupangte, Zirtirtute leh Education official te chu Raj Bhavan chhung hmun hrang hrang te tlawh kual turin a sawm nghal bawk a ni.