Chawlhkar khat chhung Mizoram District pathum – Aizawl, Lunglei leh Kolasib District-te tlawh kual tura rawn zin National AIDS Control Organisation (NACO) hotute chuan nimin chawhnu khan Lunglei DC Conference Hall-ah official-te, HIV lama thawktute, khawtlang hruaitute leh tlawmngai pawl aiawhte inkawmhona hun an hmanpui. HIV/AIDS chungchanga Mizoram, a bik takin Lunglei District dinhmun te sawiho niin HIV/AIDS donaa hmalak zel dan tur an sawiho.

Meeting kaihruaitu Lunglei DC Dr Ankita Chakravarty, IAS chuan Mizoram chu HIV/AIDS hluarna ber State a ni chu pawi a tih thu sawiin HIV/AIDS dona kawngah mitinten mawhphurna kan nei theuh a ni, a ti a. HIV/AIDS dona kawngah sawrkar emaw tlawmngai pawl emaw chauha innghah a hun tawh lova, mipui zawng zawngte tanrual a hun tawh takzet a ni tiin mipuite a zau thei ang bera HIV/AIDS laka inven dan leh inenkawldan chungchangte hrilhhriat an nih zel theihna turin Lunglei District mipuite thawhho puiah a sawm.

Dr Pradeep Kumar, Programme Officer (Surveillance), NACO chuan ‘HIV Epidemic in Mizoram: An Overview’ tih thupui hmangin kalkhawmte zirtirna a pe a. India ram puma HIV hluar dan (prevalence) report ‘HIV Estimations 2017’ Technical Report ah puitling (15-49 yrs) ah Mizoram (prevalence – 2.04) chu HIV hluarna ber State a ni a. Mizoram dawtah hian Manipur (prevalence – 1.43) chu pahnihna niin Nagaland (prevalence - 1.15) chu pathumna a ni. ‘HIV Estimations 2017’ ah hian HIV hluarna ber State kan nih bakah Mizoram chu HIV kai thar (New Infections Rate) tamna ber State kan ni mek bawk. Lunglei District-ah pawh HIV hrik kai thar hmuhchhuah belh zel niin 2014-15 ah mi 76, 2015-16 ah mi 81, 2016-17 ah mi 90, 2017-18 ah mi 108, 2018-19 (August thleng) mi 108 te hmuhchhuah tawh an ni a. Heng zinga a tam berte chu mipat hmeichiatna leh drugs inchiu atanga HIV hrik kai an ni.  Mizoram State AIDS Control Society (MSACS) chhinchhiah danin, Mizorama HIV hrik pai hmuh chhuah ṭan aṭanga August 2018 thleng khan Mizoram pumah HIV hrik pâi 18,007 hmuh chhuah an ni tawh a.

Dr Bhawani Singh, Deputy Director, NACO chuan India rama HIV/AIDS prevalence a tlakhniam tawh mek laia Mizoramin san lam a pan mek zel thu sawiin HIV darh nasa zel veng turin NACO-in theitawp a chhuah zel tur thu a sawi a. Chawlhkar khat chhunga Mizorama an tlawh kulana report chu Sawrkar Laipui Ministry of Health and Family Welfare (H&FW) ah an thehluh thuai tur thu sawiin HIV/AIDS dona chu ngawrh tak leh chak zawka kalpui zel a nih tur thu a tarlang bawk.

Inkawmhona ah hian Lunglei DC, Additional DC, IPRO leh SDPO te bakah H&FW Department a CMO, SMO, Medical Superintendent, District AIDS Control Officer, Blood Bank Officer, ICTC Incharge, ART Incharge, OST Incharge, STI Incharge te, ICTC Christian Hospital Serkawn, Joint VC Chairman, YMA Sub Hqrs President, MHIP Sub Hqrs President, Chiarman WADA, Grace Society, District Project Manager, NHM te an tel a ni.