India ramin Zirtirtu tha leh tling te hnena chawimawina a pek sang ber National Award to Teachers chu Pu Lalhmingmawia Ralte, Lecturer, Govt. Republic Higher Secondary School leh Pu C. Biaknghinglova, Headmaster, Govt. Ramhlun North Primary School te chuan September 5, 2012 (Teachers’ Day) khan Shri Pranab Mukherjee, President of India hnen atangin an dawng.

He National Teacher Award hlanna inkhawm hi Vigyan Bhawan, New Delhi-ah neih a ni a, India ram pum atangin Zirtirtu 330 zetin an dawng a. A hmun ah hian Pu Lalhmingliana, Member of Parliament (Rajya Sabha) leh Pu Zorammawia IPS -ten a an tawiawm bawk a ni.

National Teacher Award Function-ah hian Shri Pranab Mukherjee, President of India chuan Zirtirtu zawng zawng te chu duhsakna a hlan a, Zirtirtute chu êng/khawnvar êng (lamps) anga tehkhinin êng chhuak zêl turin a fuih a, Pathian hruainaa hun hmang zel turin duhsakna a hlan a ni.

Teacher Awardee-te hi September 4 zing khan Dr. Man Mohan Singh, Prime Minister of India chuan a chênna In-ah breakfast a kilpui a, Inkawmkhawmna hun tawite a hmanpui. Zirtirtu Award dawngte lawmpuina thu a sawi a, Zirtirtute avanga India ramah per Capita Income a sàn phah thu te sawiin hmalam hun chu Zirtirtu-ah a innghat a ni tih a sawi a, Zirtirtute chu ‘True National Builder’ an nih thu a tarlang bawk. Shri Kapil Sibal, Minister of Human Resource Development, Government of India pawhin Prime Minster In-ah hian thu sawiin Teacher Awardee te chu ‘Great Teacher an ni’ tiin a sawi.