168/2026-2027  

Lawngtlai, 16th April 2026: Vawiin khan 'National Bamboo Mission, Lawngtlai District' chuan an Chairman leh Bawrhsap nibawk Pu Donny Lalruatsanga kaihhruaiin a Office Chamber-ah thutkhawm an nei. 

Pu Donny Lalruatsanga chuan kalkhawmte hnena lawmthu sawina a nei hmasa a. Mau tangkaina kawng hrang hrang a tam hle tih tarlangin, a chin  leh enkawl kawngah chak zawka hmalak a tul hle a ti a. Tun dinhmunah  National Bamboo Mission hnuaia Lawngtlai District - telh a la ni lo chu mimal taka veiawm a tih thu tarlangin, Lawngtlai District - ah kalpui a nih ngei theih nan hmalak a nih tur thu a sawi a. Nations Bamboo Mission - hnuaia tanpuina  leh hamthatna awm ang angte Lawngtlai District - ah kalpui a nih theih nan theihtawp chhuah a tul takzet tih tarlangin, hemi kawngah hian sawrkar lamah ziaka  thlen a nih tur thu a sawi a. Bawrhsap chuan  Lawngtlai District chhunga Mau chingtute tan hamthatna siam leh mi tam zawkin eizawnna atan a an hman chu tihmakmawh a nih thu tarlangin, chak taka hmalak a nih tur thu a tarlang bawk. 

Pi Laldintluangi Ralte,  Member Secretary chuan National Bamboo Mission - kalpui dan tlangpui sawizauna a nei a. Mizoram Sate Bamboo Mission chu kum  2018 atang khan Horticulture Department - ten  an kalpui  tan tih tarlangin, hlawhtling taka kalpui mek zel niin, a bik takin Area expansion-  chak zawka kalpui a nih thu a sawi a. Mizoram Bamboo Centre, Lengpuiah Mau  atanga thil siam chhuah dan chi hrang hrang zirtirna kalpu a nih thu sawiin, mi tam takin an chhawr tangkai mek a ni, a ti. 

Thutkhawmah hian thil pawimawh tak tak sawiho a ni a. Mau atanga thil siam chhuah dan zir kawngah Lawngtlai District- atanga trainee tam zawk awm thei tura hmalak ni se an ti a. Mau chin leh enkawl, tharchhuah kawngah mi tam zawkin eizawnna atan a an hman theih nan Slscheme kalpui tura tan lak thar ni se an ti a ni. Mau chin leh tharchhuah kawngah a ram leilung dinhmun kimchang  a hmunah kala zirchianna neih ni se, zau zawka ching tura hmalak ni se an ti a ni. Mau chi ( Species) tha leh a ram leilungin a ngeih tur zirchianna kalpui ni se an ti bawk a ni. 

Vawiin thutkhawmah hian ' National Bamboo Mission, Lawngtlai District' Member- te an tel kim tha hle a, Pu Donny Lalruatsanga chuan lawmthu sawina neiin hun a khar.