Vawiin chawhma dar 10 khan Parliamentary Secretary Pu Joseph Lalhimpuia hovin School Education Department officer-ten National Cleanliness Day hman dan tur an rel.

Kumin National Cleanliness Day hi January ni 30, Inrinni anih avangin meeting chuan January ni 29, Zirtawpni-a hman zawk nise tiin an rel a. National Cleanliness Day pual hian Primary School atanga Higher Secondary School zawng zawngte chu mahni school compound leh a chhehvel tihfaia hnatlang nei tur a hriattir niin, School Education Minister Pu H. Rohluna pawhin Govt. K.M. High School, Aizawlah faina hnatlang bul a tan pui dawn a ni. School mai bakah School Education Department hnuaia office zawng zawngte leh SCERT leh DIET-te pawh faina hnatlang nei tura beisei an ni a. Zirlaite chu vengchhung thenfai hnatlang neihpui turin Local/Village Council leh tlawmngaipawlte chu sawm ni se an ti bawk.

Nikum January ni 30 khan National Cleanliness Day hman a lo ni tawh a. Hemi tuma faina hnatlang thalakte chu cleanmizoram.com website-ah upload niin, North East Social Impact Award chu IT category-ah Clean Mizoram Movement in a lo dawng tawh nghe nghe a ni. Kumin pawh hian hnatlang thalakte chu hastag hmanga social media - Instagram, Twitter leh Facebook-ah te upload in, mahni hnatlanna hmun atangin thalak upload theuh nise tih meeting-ah hian rel a ni bawk.

Meeting-ah hian Parliamentary Secretary Pu Joseph Lalhimpuia bakah School Education Department Director Pu K. Lalthawmmawia, Directorate, RMSA leh SSA Officer-te an tel a ni.