3393/2024-2025

Aizawl, the 5^th December 2024 : Nimin tlai dar 5 khan State Guest House Chaltlang ah National Commission for Minorities (NCM) Member Shri Dhanyakumar Jinappa Gunde chuan District Council & Minority Affairs Department hotulute leh sakhaw pathum - Kristian, Muslim leh Buddhist aiawh te kawmin Mizorama NCM huang chhunga minorities tih ten an dikna leh chanvo an hmuh leh dawn dan te chungchangte leh hamthatna  an dawn tur angte an dawng em tihte a sawipui a ni.

Shri Dhanyakumar Jinappa Gunde chuan NCM dinchhan, hnathawh dan leh bultum tlangpuite sawiin a lokal chhan ber chu Mizoram chhung ah NCM huang chhunga awm Minorities te dinhmun hre tur leh harsatna an nei em tih te hre tur lokal ber anih thu a sawi a. India Ram Danpui hnuaiah Minorities te chu tute ber nge an nih hrilhfiahna awm lo mahse minorities te dawnkanna leh an dikna chanvo chungchang sawi leh ziahlan anih a ti a. NCM huang chunga Minorities tih te – Kristian, Muslim, Buddhist, Sikh, Jain leh Parsi te chu an nih thu a sawiin hengte dikna leh chanvo chu an bitum ber a nih thu a sawi lang.

Pi Sangchhin Chinzah, Secretary, District Council & Minority Affairs Department chuan Mizorama mihring cheng za zelah 85 chuang vel chu Minorities an nih thu sawilangin Mizoram dinhmun tlangpui a tarlang a. Council of Churches in Mizoram aiawhte chuan hna lakna Exam hrang hrang leh Sawrkar Laipui programme thenkhat Pathianni ah neih thin chuan Mizoram Kristian te tan harsatna a siam thin thu NCM Member an hrilh a ni.

Meeting ah hian Council of Churches in Mizoram, Muslim Welfare Association, Chakma Buddhist leh CADC, LADC leh MADC aiawhte an tel a ni.