2881/2024-2025

Aizawl, the 7^th November 2024 : Nimin tlai khan National Commission for Scheduled Tribes (NCST) Member Pu Nirupam Chakma chuan State Guest House Chaltlang ah Social Welfare, Tribal Affairs and Women & Child Development Department hotute leh Department-a thawk dangte meeting a neihpui a, NCST Full Commission in nakum January thla tawp lamah Mizoram an tlawh tum thu sawiin hemi atan a tul tul ruahmanna te lo siam turin a chah a ni.

Pu Nirupam Chakma chuan NCST chu India Danpui hnuaia Scheduled Tribes te an dikna leh chanvo an dawn tur leh hengte humhalha enzui turte leh kawng hrang hranga an hmasawnna chungchanga Sawrkar Laipui thurawn petu atan din a nih thu te sawiin NCST chuan heng bakah hian ST te chunga tihduhna emaw hleilenna emaw a thlena palha NCST thuneihna chunchangte pawh a sawilang a. NCST Full Commission chuan nakum January thla tawp lamah Mizoram an tlawh duh thu sawiin hemi chungchanga ruahmanna te chu uluk taka siam nise tiin a duh thu a sawi a. Meeting ah hian Commission in Mizoram an tlawh hunah Review Meeting bakah Press Conference leh NGO te nena inkawmhona leh Autonomous District Council 3 te tlawh hun pawh buatsaih nise tiin a duh thu a sawi lang bawk a ni. Kawng hrang hranga Mizoram ST te hma an sawn nan National Scheduled Tribes Finance and Development Corporation (NSTFDC) leh Tribal Cooperative Marketing Development Federation of India Limited (TRIFED) hman tangkai dante dap turin a chah bawk a ni.

Meeting a tel Department a thawkte chuan tribal tana hamthatna hrang hrang an kalpui mekah an harsatna tawh, an duh khawp lohna leh rawtna an nei te an sawi lang a. Chungte chu ziaka NCST lamah thlen turin Pu Nirupam Chakma chuan Department te chu thurawn a pe a ni.

Pu Chakma hi kumin March thla khan National Commission for Scheduled Tribes Member atana lakluh niin tunah hian NSCT ah hian Chairperson bakah Member 3 an awm mek a ni.

Pu Nirupam Chakma hi Advisor to Chairperson, NCST Pu Konthang Touthang bakah NCST Deputy Director leh NCST hnathawk midangten an tawiawm a. Social Welfare, Tribal Affairs & Women & Child Development Department Joint Secretary Pi Zonuthari leh Department officials engemaw zat te chu meeting ah an tel bawk a ni.