398/2025-2026

Aizawl, the 30th April 2025 : National Commission for Scheduled Tribes (NCST) Full Commission Mizoram lo zin mek te chuan vawiin khan Mizoram Sawrkar hotulu te chu Secretariat Conference Hall-ah Mizorama Scheduled Tribe te dinhmun, an dikna leh chanvo leh an tana scheme hrang hrang hnuaia hmalakna te thlirin review meeting an neihpui a, Commission-in thil an hmuhdan leh hma lakna tur la awm mek nia an hriatte an sawilang bawk a ni. NCST hi an Chairperson Shri Antar Singh Arya in ho in, Commission Member awm zawng zawng mi 3 – Pu Nirupam Chakma, Dr. Asha Lakra leh Shi Jatothu Hussain te pawh an tel a. Mizoram Sawrkar hotulu te chu Chief Secretary Pu Khilli Ram Meena leh DGP Pu Anil Shukla ten an ho ve thung a ni.

NCST Chairperson Shri Antar Singh Arya chuan Mizorama Hindi zir leh ngaihpawimawh tul nia a hriat thu te sawilangin Mizoram Hindi medium school hawn dawn kawng zawn nise tiin a duh thu a sawi a. Tlangram loneih dan bansan nan project siam nise tiin rawtna a siam a. Mizoram Sawrkar hotulu kalkhawmte chu an mahni pawh tribal an nih vek avangin mahni tribal leh hnampuite hmasawnna atana theihtawp chhuah turin a fuih a ni. NCST Member Pu Nirupam Chakma chuan ST te dinhmun chawikan nana NCST mawhphurna leh thuneihna a neih dan te sawiin Mizoram mipuiin zinga NCST hnathawh dan leh ST te tana hma an lak theih hria an tam lo nia a hmuh thute a sawi a. Hemi kawngah hian tan lakna tur a awm niin a sawi lang bawk. Dr. Asha Lakra chuan zirna leh hriselna kaihhnawih chungchanga thil a hmuh dante thil tha tih thei nia a hriatte a sawilang a ni.

Chief Secretary Pu Khilli Ram Meena chuan Mizoram a cheng za zelah 94.45 chu Scheduled Tribes an nih avangin Sawrkar programme zawng zawng chu ST te hamthatna tan zel a ni thu sawilangin Mizoram Sawrkar hmalakna hrang hrang te a tarlang. NCST in thu an zawhna questionnaire chhanna nihpah fawmin Planning & Programme Implementation Secretary, Tribal Affairs enkawltu ni bawk Pu Lalmalsawma Pachuau chuan presentation hmangin ST te hamthatna leh hmasawnna atan Mizoram Sawrkar hmalakna leh scheme hrang hrang hnuaia dinhmun leh NCST in thil hrang hrang an hriat duhte te a sawi. NCST Secretary Pu Puneet Kumar Goel chuan Mizoram Sawrkrin chhana pek te chungchang sawiin Commission in information hrang hrang an duh belh te a tarlang a ni.

Meeting ah hian Mizoram Sawrkar hnuaia Commissioner leh Secretary te chu an tel deuh vek a ni.

NCST hian Official te meeting an neihpui zawh ve leh Press Conference an nei chhunzawm a. He hunah hian ADC 3 – CADC, MADC leh LADC te an tlawh thu te, heng ADC huam chhunga sawrkar hmalakna an zirchianna chungchang te Chanchinbumite hmaah hian an sawi a. Mizoram Sawrkar Department hotulute nena an inkawmna chungchang leh an ngaih pawimawh te an sawi bawk a ni. Press Conference an neih zawhah MINECO a Smart city hnathawh mek, Urban Landscape & Avenue Plantation, “Aizawl Sumtual” an tih bawkah “Ek Ped Maa ke Naam” Campaign bawhzuiin thing tiak an phun nghal bawk a ni.