2211/2022-2023
Aizawl, the 7thOctober 2022 : Nimin tlai khan National Commission for Scheduled Tribes (NCST) Member Ananta Nayak chuan State Guest House Chaltlang ah Mizorama tlawmngai pawl – CYMA, MUP leh MHIP hruaitute bakah Bawm leh Pang zirlai pawl hruaitute kawmin NCST hnathawh leh thu neih dante a hrilh a, heng pawl atangin harsatna leh rawtna te a ngaihthla bawk a ni.

Pu Ananta Nayak chuan NCST chu mi tam takin an hriatchian loh avangin Sawrkar Laipui Commission tenau emaw an ti thin ti sawiin NCST chu Ram Danpui hnuaia din constitutional body a ni a, tribal te dikna leh chanvo chungchangah thuneihna sang tak kan nei a ni, a ti. Chungte chu Sawrkar Laipui scheme hrang hrang hnuaia tribal te hamthatna dawn mek endik leh heng chungchanga rawtna thlen te, tribal te dikna leh chanvo palzut aniha chung chungchanga thu thlenna an nih dante leh a tul anga Sawrkar thuneitute an hmaa in lan tir te NCST thuneihna thenkhat a ni, a ti.

NCST Member lo tawiawmtu NCST a Joint Secretary Konthang Touthang pawhin NCST chungchangte sawiin Mizorama tlawmngai pawlte chu tribal te hamthatna dawn tur haichhuah kawngah te, tribal te dikna leh chanvo humhalh kawngah te hma an lak dan chu fakawm a tih thu a sawi.