Nimin chawhnua lo thleng sawrkar laipuia National  Commission for Women (NCW) Member Pi Rekha Sharma chuan vawiin khan Mizoram State Commission for Women (MSCW) Office, Crime Against Women Cell leh Protective Home a tlawh.

Pi Rekha Sharma chuan MSCW tlawhin a hmunhma a fan hnuah Mizorama hmeichhe tlawmngai pawl hrang hrang- Mizo Hmeichhe Insuihkhawm Pawl (MHIP), Mizo Hmeichhe Tangrual Pawl (MTP), All Women’s Federation, Panchayat Mahila Shakti Abhiyan (PMSA) leh Young Women’s Christian Association (YWCA) hruaitute nen inkawmhona hun an hmang a. Heng pawl aiawhte hian Mizoram hmeichhiate dinhmun chawikan leh siamthatna kawngah hna an thawh dante tarlangin an mamawhte an thlen a. NWC member chuan an thu thlente ngun taka ngaihthlaksakin mimal, pawl leh sawrkar anga tanpui an ngaihna laiah a tul anga tanpui a tum thu a sawi a ni. Aizawl Police Station-a Crime Against Women Cell tlawh chhunzawmin hmeichhe police-te hnathawh dan a hmunah a enpui a. Kum 2016 chhung khan hmeichhiate chunga pawikhawihna chi hrang hrang case 178 awmin January 2017 chhung khan case 17 a awm hman a ni. 

NWC member Pi Rekha Sharma hian Social Welfare Department hnuaia hmeichhiate enkawlna hmun Protective Home, Hunthar Veng tlawhin chipchiar takin a hmunhma a fang a. He Home hi chhan hrang hrang avanga vanduaina tawk leh humsual dai hmeichhia te enkawlna leh nun kawng dik an zawha eizawnna kawng an neih theihna tura tanpuina hmun niin ei leh in, chenna in leh an mamawhte a thlawna pek vek an nih piah lamah eizawnna an nei theihna turin beauty culture, puanthui, puantah leh computer training te pek thin an ni bawk. Pi Rekha Sharma chuan Protective Home enkawl dan lungawithlak a tih thu sawiin sawrkar chauh nilo tlawmngai pawl dangte nena thawhhona tha an nei chu lawmawm a ti a. Mimal anga puih a inhuam thu sawiin Protective Home hnuaia society “Beiseitu” tanpui nan ama mimal pawisa Rs.10,000 a hlan a. He Home atanga tha taka chhuak hmeichhiate enkawl zui zelna tur leh Protective Home mamawh zualpui phuhru turin tul leh mamawh nia an hriatte Home enkawltute hian a hnenah thlenin State pawn lama NGO te leh mimal thahnemngaite zingah tanpuina zawnsak a inhuam thu a sawi tel bawk a ni.

Pi Rekha Sharma hi Mizoram State Commission for Women (MSCW) Member Secretary Pi Lalbiakkimi leh MSCW member pahnih - Dr Lalrindiki Fanai, Mizoram University leh Pi Sylvie Z.Ralte, Chief Judicial Magistrate, Kolasib-ten an tawiawm a ni.