3790/2022-2023

Aizawl, the 9th March 2023: Vawiin khan Raj Bhavan-ah Pu D. Dharma Rao, National Consultant - PMTBMBA, Central TB Division (CTD), Ministry of Health & Family Welfare, GOI chuan Governor Hari Babu Kambhampati a hmu a. He hunah hian Pu D. Dharma Rao leh State TB Cell hotute chuan PowerPoint presentation kaltlangin PM TB Mukh Bharat Abhiyan hnuaia Mizoram chhunga hmalakna kal mek an sawifiah a ni.

Governor Hari Babu Kambhampati, TB Patient Nutritional Support program atana sum thawhtu/Nikshay Mitra of the TB Patient Nutritional Support program ni bawk chuan sum leh pai hmanga TB Natna vei te Chaw tha hlui tu zawng zawng te chungah lawmthu a sawi a. "Mizoram chu kan la vannei a,TB vei pawh mi sangkhat chuang vel chiah kan la nih avangin tan tan lak deuh chuan TB vei ei leh in tha mamawhtu zawng zawng te hi kan pui vek theih a rinawm a. MLA te, mipui aiawh thlan tlin body hrang hrang te, College hnathawk leh Sawrkar hnathawk dang te pawh he rawngbawlna huangah hian rawn lut zel turin ka ngen nawn leh a ni", a ti. Governor chuan State TB Cell chu mipuite a kaihruaitu pawimawh tak - kohhran hruaitute leh tlawmngai pawl te phungbawmna pawh sawm turin a chah bawk a ni.

Tun dinhmunah, Mizoramah hian TB natna vei, inenkawl mek mi 1321 an awm mek a. Heng damlo zinga mi 989 te hian chawtha leina atana tanpuina an mamawh a. Vawiin thlenga TB natna vei te tanpuina atana Nikhshay Mitra program kaltlanga sum thawh tute hi mi 400 chiah an awm mek a ni. Nikshay Mitra program hnuaiah hian TB natna vei te chawtha leina tur thawh duh tan tanpuina a thawh theih a. TB patient pakhat tana chawtha(nutrition) atana senso chu mi pakhat tan thlakhatah Rs 650 anga chhut mek a ni a. reports.nikshay.in/FormIO/DonorRegistration ah hian registration a tih theih reng a ni.

Meeting neih zawhah hian Governor hnenah hian lawmthu sawina certificate Ministry of Health & Family Welfare, Government of India hlan a ni a. State TB Cell hnenah pawh hlan a ni bawk.

Tunah hian Governor chuan TB vei mi 20 tan an chaw tha leina tur pawisa a thawh mek a. Ram hruaitu zingah Dr. R.Lalthangliana, Health Minister, Home Minister Pu Lalchamliana, Er.H.Lalzirliana, MLA, leh Dr. K.Beichhua, MLA te pawhin he rawngbawlna huangah hian an thawh mek bawk a. LADC leh MADC hotute zingah pawh he rawngbawlna a tel an awm nual a. Sawrkar hnathawk zingah chuan Doctor an la tam ber rih a ni.