3297/2022-2023

Aizawl, the 19th January 2023: Ministry of Defence hnuaia National Defence College, New Delhi-a training lai sipai hotulu te leh faculty ten Mizoram an rawn tlawh dawn avangin vawiin khan Home Secretary Pu Lalengmawia hovin Secretariat Conference Hall, MINECO ah thlir lawkna meeting pawimawh neih a ni.

National Defence College hian India ram dung leh vanga mi chengte nunphung zirchiang leh hmelhriat turin Understanding India Study Tour an nei mek a. He an study tour neih mekah hian State an tlawh tur zingah Mizoram chu thlan a ni a. January ni 29 ah Mizoram an lo thleng ang a, ruahman lawk ang chuan February ni 4 ah Mizoram an chhuahsan ang. An cham chhung hian Mizoram chhunga District pathum - Aizawl, Serchhip leh Kolasib te an tlawh ang a. Mipui mimir hmasawnna leh chawikanna lam hawi sawrkar hmalakna hrang hrang - Rural Development, Panchayati Raj, Law and Order, Women Empowerment, Health, Agriculture, Education, Energy Sector te bakah tlawmngai pawlte hnathawh dan a hmunah an rawn zir chiang dawn a ni.

An cham chhung hian heng District hrang hrangah hian sawrkar hmun pawimawh te tlawhpui an ni ang a. Sawrkarin hmasawnna ruhrel a siam mek te a hmunah an fanpui ang a, official pawimawh te leh tlawmngai pawl te nen inhmuhkhawmna hun buatsaihsak an ni ang a. Mizoram Sawrkar hotulu te pawh hmuhpui tum an ni.

National Defence College a training mek sipai officer leh defence mi pawimawh lo kal tur te hi an vaiin mi 18 an ni a. NDC-a faculty ni mek Major General Hari B.Pillai chuan NDC team te hi  a rawn hruai dawn a ni.