3296/2022-2023

Aizawl, the 19th January 2023: Governor Hari Babu Kambhampati chuan vawiin khan Durbar Hall, Raj Bhavan-ah "Exam Warriors" tih lehkhabu Prime Minister Narendra Modi in rilru engthawl taka zirlai ten Exam an hmachhawn theihna tura a ziah chu a tlangzarh.

Governor Hari Babu Kambhampati chuan "Exam Warriors" tih lehkhabu chu zirlaite tan leh nu leh pate tana chhiar ngei chi lehkhabu tangkai bik a ni tih a sawi a. Exam Warriors chu Prime Minister in zirna a ngaih pawimawhzia tilangtu mai a ni lo a; exam hmachhawn tur zirlai tam tak te mangang leh rilru hah thin chu a vei em em a kawng dik kawh hmuh tumin a thusawina hmun tam takah hemi chungchang hi a sawi thin a ni a ti. Prime Minister in lehkhabu a buatsaih, "Exam Warriors" chu Exam chungchanga zirlaite leh an nu leh pate kawngdik kawh hmuh tumna a ni a. He lehkhabuah hian Exam chu rilru hah leh huphurh ang zawnga hmachhawn tur a ni lo tiin zirlaite leh nu leh pate chu a kawh hmuh a. Exam chu phur takin kutpui hmang tur anga inbuatsaih a hmachhawn zawk tur a ni a. Kumtluana thawhrimna te hlawk taka seng tura rilru pu turin a fuih a ni a ti.

Exam Warriors Lehkhabuah hian 34 Mantras/zirtirna a awm a. Heng zinga 28 hi zirlaite pual a ni a, 6 hi nu leh pate tana chhiar tur a ni thung. He Lehkhabuah hian Zirtirtute hnenah PM Modi in lehkha a thawn leh Yogasanas te pawh a awm tel a. Lehkhabu hi National Book Trust, New Delhi atanga lei theih a ni a, lehkhabu chhutu, Penguin Random House India atanga lei theih a ni bawk. School Education Department hotute chuan lehkhabu hi la chah chhuah an tum tih an sawi bawk.

Lehkhabu tlangzarh program hi Dr Lalzirmawia Chhangte, Secretary, School Education in a kaihruai a. Governor in a tlangzarh hnuin Pi Pinky Zosangpuii, Dy Secy, School Education chuan lawmthu sawiin huntawp a khar thung a. School Education Department hnathawk te, zirtirtute, zirlai te leh sawmbik mi thenkhat te an tel a ni.