226/2022-2023
Dated Serchhip, the 22nd April, 2022: Vawiin khan National Deworming Day, 2022 chu Serchhip District ah pawh hman a ni a, Govt. Serchhip Higher Secondary School ah bawrhsap Pi Nazuk Kumar, IAS chuan khuallian niin he hun hi a hmanpui a ni.

Pi Nazuk Kumar chuan, hun engemaw chen Covid19 hripui vanga school khar a nih hnuah kan han kal tan leh thei ta a, a lawmawm hle a ni. Tluang taka kan kal zel theih nana pawimawh em em chu mitinten tha taka Covid19 himna dante kan zawm tlan hi anih avangin zirlai naupangte leh mitinin CAB tha taka kan zawm zel a tul hle a ni, a ti. Kumtina kan neih thin angin National Deworming Day a lo thleng leh taa, he hunah hian naupang kum 1 atanga kum 19 inkar zawng zawngte chu rulhut hlo eitir vek tura an ni. Rulhut hian kan than chhohna kawngah kan taksa leh rilru thlenga a tha lo zawnga nghawng a neih avangin kan district chhunga he damdawi ei tur kum bithliah huam chin te chuan kim taka lo ei vek turin ka ngen a ni, a ti. Zirlai naupangte chu tun hi an vanglai, a nuna hun pawimawh tak an hman lai a ni tih hriaa hlim taka chena nasa taka lehkha zir turin a chah a, thianghlimna leh hriselna atana kawng thate zawh tum tlat zel turin a fuih bawk. Thu a sawi zawh hian khuallian hian Rulhut hlo hi naupang thenkhat te hnenah a sem a ni.

Dr. Lalngaihawmi, District Surveillance Officer chuan Rulhut in taksaah harsatna a thlen dan leh a inven dan te, Rulhut hlo ei a pawimawhna te chipchiar takin a sawi bawk.

He hunah hian Pu RK Sanghmingliana, Principal, Govt. Higher Secondary School leh Pu Vanlalchhana, SDEO te pawhin thusawina hun an hmang a ni.

National Deworming Day, 2022 hawnna ni atanga hapta khat chhungin Serchhip district a naupang kum 1 atanga kum 19 zawng zawngte chu rulhut hlo eitir vek tura hmalak a ni a. Anganwadi leh School ah te sem a ni ang a, school bansan tawhte hi ASHA in an dapchhuak leh dawn a ni.