227/2022-2023
Aizawl, the 22nd April 2022: Vawiin chawhma khan Government Mizo High School, MacDonald Hill, Aizawlah Mizoram state puam huapa neih tur ‘National De-worming Day (NDD) 2022’ chu Sikul Naupang thlan chhuah te hnena Rulhut hlo ei tur peiin School Education Minister Pu Lalchhandama Ralte chuan a hawng. NDD atan hian Health & Family Welfare Department chu Nodal Department a ni a, School Education Department, Women & Child Department, UD&PA, RD leh PHED te chu stakeholder department an ni thung a ni.

School Education Minister Pu Lalchhandam Ralte chuan NDD hman a ni leh ta chu lawmawm a tih thu sawi a. A bik takin he ni hi School Education Department hnuaia zirlaite leh Women & Child Department hnuaia Anganwadi naupangte tan a pawimawh zual a ti. Naupang leh tleirawlte hriselna atan pawimawh tak chu rulhut laka fihlim a ni tih a sawi a. Mizoram sawrkarin Deworming a ngaih pawimawh em avangin sawrkar sikul bakah private leh kohhran sikul enkawlah te thlengin he hmalakna hi seonso pawh tam deuh hmahse kalpui a ni dawn a, sikul chawlhsan tawh naupang te thlenga huam a la ni dawn a ni a ti. Rulhut avanga hrisellohna nei naupangten zirna kawngah te leh an taksa than chhoh zelna kawngah harsatna a siam thin tih a sawi a. He harsatna hi naupang ten an neih lohna turin Sawrkar laipui chuan NDD chu a buatsaih thin a, state sawrkar pawhin he hmalakna hi tha a ti a, a ngaipawimawh hle tih a sawi bawk.

NDD huanga an hmalakna bakah Nodal Department leh Stakeholder department te chu theihtawp chhuah zel a, Mizoram mipuite hnenah hriselna atana thianghlimna a pawimawh zia uar zawka zirtir turin a ngen a. “AMC kaltlangin bawlhlawh sawngbawl kawngah hma kan sawn viau tawh emaw tih lain ruah bawhhawk a sur meuh chuan kan la tawp zia a lang chiang hle a, tanlak kan la ngai hle a ni”, a ti. Mimal tin ten kan taksa vawnfai, intihthianghlim leh hriselna tura hma kan lakna tluk zetin khawlai fai leh thianghlim tura kan mawhphurhna te kan hriatchian a pawimawh a ni a ti bawk.

NDD puala zirtirna leh sawrkarin a kalpui dan te, hlawhtlinna leh tanlak ngai lai te Powerpoint Presentation hmangin Dr Lily Chhakchhuak, SPO(RCH) & DD(FW) chuan a pe a. Rulhut chi hrang hrang te chu khawsakdan hrisello – zun leh ekna hmun thlahdah, kut silfai loh, pheikhawk bun thlahdah, thil eitur silfai thatloh, tuithianghlim lo in leh khawsak dan tawp dang te avanga kai thin a ni tih chiang taka sawifiah a ni. Naupang leh tleirawl rulhut pai te chuan thisen an tlachham thin a, an than a thu a, an thluak chak lovin an zirna an hnehlo a, kawthalo leh natna dang ten a tlak buak thin tih chu mithiamten an hmuhchhuah dan a ni. WHO chhut dan chuanIndia ramah naupang kum 1 leh kum 14 inkara mi vaibelchhe 24.1 te chu rulhut kai awlsamna hmuna khawsa leh cheng an ni. Mizoram bik hi India rama State leh UT zingah Rulhut kai awlsamna ber state 11 zinga a 8-na a ni mek bawk a ni.

NDD hi India ram pum huapin kumtin February 10 apianga hman thin a ni a, he mi ni hian a rualin Naupang kum 1 leh kum 19 inkar ten Rulhut hlo (Albendazole) Dose khatna an ei thin a, thlaruk hnuah dose 2-na an ei leh a ngai a. Hrileng avangin nikum lamah khan Mizoramah chuan NDD chu October thlaah neih a ni a.Hei vang hian kuminah chuan April thlaah neih a ni ta thung a ni.

NDD hawnna hun hi Dr H.Lalchungnunga, Director, DHS in a kaihruai a. Pi Lallianpuii, Director, W&CD leh Pi Lallianzuali, DD, School Education ten fuihna thu an sawi a. Dr C.Lalzepuii, Joint Director, DHS in lawmthu sawiin hun a khar thung a ni.