1508/2022-2023
Dated Serchhip, the 8th August, 2022: Vawiin khan Serchhip District Co-ordination Committee on Har Ghar Jhanda chu an Chairman Pi Nazuk Kumar, IAS hovin DC Meeting Hall ah an thukhawm a, sawrkar laipuiin a beisei anga chhungtinten Independence Day, 2022 puala hnam puanzar an neih ngei theih dan tur an sawi ho.

Pi Nazuk Kumar chuan, kan ramin hnam dangte awpbehna hnuai ata zalenna a hmuh champha phak vawi 75na pualin tun kum kal mekah a lawmna kawng chi hrang hrang kalpui a ni a. Azadi Ka Amrit Mahotsav tiin sawrkar hmalakna tinrengah he zalenna cham lawmna hi kalpui a ni. Kumin Independence Day a lo thlen hian sawrkar laipui chuan chhungtinte chu kan chenna in theuhvah India hnam puanzar chhuang taka lo tara, zalenna cham lo lawm theuh turin min ngen a. Kan hnam puanzar pawh a thlawna sem ngawt lovin khua leh tuiten neitu nihna nei chung leh he ram tan hian mawhphurhna pawimawh tak kan chelh ve a ni tih inhre chunga man tlawmtea lo lei ve ngei tura min beisei avangin pakhat Rs. 20 chauhva khul theih turin ruahmanna a siam a ni. Ram hmangaihna leh neitu thinlung dik tak pu chunga lo lei ngei turin chhungtinte ka ngen che u a, a tar hun tura ruatah lo tar ngei turin ka sawm bawk che u ni, a ti a. India Hnam Puanzar chu chhungtinten kan neih ve ngei ngei ngai hnam thil hlu a ni a, tun hun remchangah awlsam leh tlawm taka lei theihna hun a inhawng a ni, tiin zalenna champha lo thleng tur lawmna atana in tina National Flag zar a nih ngei theih nan leh National Flag neih theihna hun remchangah mipuite chu Flag hi lo lei theuh turin a ngen a ni.

National Flag hi Block Development Office pahnih E. Lungdar leh Serchhipah te pek chhuah a ni tawh a. Khawpui chhung Village Council 14 ah dah ni bawkin VC te hian an bial chhung mipuite hnenah pakhat Rs. 20 zela lei turin an chhawp chhuak dawn a ni. India ram zalenna champha kum 75 lawmna kal zelah tun thla August ni 13 atanga ni 15 inkar hian in tinah Hnam Puanzar hi lo zar vek turin sawrkar laipui chuan khua leh tuite min beisei a ni.

Vawiina meeting hian VC kaltlanga mipuite hnena chhawpchhuah tak chu ngaihchan zui ni se, a tul ang zela umzui ni se tiin an rel a ni.