1509/2022-2023
Dated Kolasib: The 8th August, 2022: State Election Commission thuchhuah angin Kolasib District chhunga Bairabi North, Kolasib Venglai leh Zanlawnahte VC By-election neih tur a nih angin, hemi atan a inpuahchahna kalzel ah vawiin chawhnu khan Pu John LT Sanga, District Election Officer chuan VC By-Election neihna tur khuaa Final Electoral Roll-te chu DC Conference Hall-ah a tlangzarh.

Pu John LT Sanga, District Election Officer chuan India ram chu Democracy ram lian ber kan ni a, inthlang ram kan nih angin electoral roll-ah inziah luh hun pawh Election Commission of India in a hawng thin a, khawpuiah leh thingtlang hmun kilkhawr tak tak a cheng mipuiten a awlsam zawk a electoral roll-a an inziahluh theih nan GARUDA app pawh thlangzar a lo ni tawh, ati a. Ram ropui zawk pawhin an la hman tam loh tak EVM khawl hmang a inthlanna neih thin anih thu leh a nih dan tur tak a kalpui a nih chuan a langtlangin a felfai hle țhin thu a sawi.

VC By-election neihna tur khuate tan a hun takah final electoral roll tlangzarh a ni chu lawmawm a tih thu sawiin hlawhtling taka kalpui a nih theih nan a buaipuitute fakawm a tih thu a sawi.

Vawiina final electoral roll tlangzarhin a tarlan dan chuan Bairabi North ah vote nei mi 2,514 an awm a; heng zinga 1,220 te hi mipa niin, 1,294 dangte chu hmeichhia an ni a. Kolasib Venglaiah vote nei mi 2502 an awm a.  Mipa 1136 leh hmeichhia 1366 an awm. Zanlawnah hian vote nei mi 820 an awm a, mipa 377 leh hmeichhia 443 an awm a ni.

Vawiina Electoral Roll tlangzarhnaah hian  Election Officer, AERO, Political Party hrang hrang aiawh, Tlawmngai pawl aiawh leh thutharthehdarhtute an tel a ni. 

ABSTRACT OF FINAL ELECTORAL ROLLS FOR THE ENSUING BY-ELECTION TO VILLAGE COUNCIL WITHIN KOLASIB DISTRICT