3282/2022-2023

Kolasib dated 18th January 2023: Vawiin chawhma khan District Programme Office, Women & Child Development leh DC Office tangkawp buatsaihin DC Conference Hall, Kolasibah National Girl Child Day 2023 pual a ni 18 atanga ni 24, January thleng hun hmanna tur hawnna Pu John LT Sanga, Deputy Commissioner in a hmanpui a. Pu Laltanpuia Chhangte, District Mission Coordinator, District hub for Empowerment of Women chuan hun kaihruaiin kalkhawmte chuan hmeichhia naupiang enhrang lo turin leh hmeichhe dinhmun chawikan nan a mi tangkai ni turin thutiam an la bawk a ni.

Pu John LT Sanga, Deputy Commissioner chuan India ram chu hmanlai atang tawh a hmeichhiate dinhmun rahbeh nasatna ram a nih avangin tun thleng hian hmeichhe naupiang enhranna te, hmeichhe naupang dinhmun siamthat kawnga inthlahdahna te chu India ram hmun hrang hrangah a la awm thu a sawi a. Hemi a nih avang hian Sawrkar chuan hmeichhe naupiang enhranna um bo nan leh an dinhmun siamthat nana zirna kawng a kaihhruai uar lehzual nan ‘National Girl Child Day’ chu bautsaih a nih thu a sawi. Khawvel hriat pawh a mi hlawhtling tak takte phen ah kawng engkim a kaihruaitu tha tak, Nu an awm thin thu Pu John LT Sanga chuan tarlangin hei hian hmeichhia te pawimawh zia a tihchian thu a sawi a. Hmeichhiate dinhmun humhalh leh tih hmasawn tur a hmalakna chu ram leh hnam hmasawnna thlen tur a hmanraw pawimawh tak a nih thu a sawi bawk a ni.

He hun ah hian Pi Zonunpuii, Specialist, Financial Literacy, DHEW chuan National Girl Child Day 2023 pual a ni 18 atanga ni 24, January chhung a hun hman dan tur hrang hrang a tarlang a. Hmeichhe dinhmun chawikanna kawng a mi tangkai nitur a intiamna ‘Signature Campaign’ kalpui nghal a ni bawk.

India ram pumah January 24 hi National Girl Child Day atan a hman thin a ni a. Ministry of Women and Child Development bul tumin kumin ah hian 18th – 24th  January chhung hian India ram chhunga District tinah hman niin Kolasib District ah pawh District Programme Office, Women and Child Development bul tumin he hun chhung hian National Girl Child Day pual a hun hman tan a ni. Beti Bachao Beti Padhao (BBBP) hi central sawrkar hmalakna in 2015 khan din tan a ni a, a tum ber chu hmeichhe naupang te venhim a, hmasawnna kawng hrang hrang kawhhmuh leh zirna tha an dawn theih nana hmalak a ni. National Girl Child Day 2023 atan hian ruahmanna hrang hrang neih niin chung te chu; Plantation drive neih te, a tam thei ang ber BBBP stickers tar chhuah te, poster making competition (high school naupang bik tan) buatsaih te, zirlai hmeichhe naupang zing ah sport tangkaina inhrilhhriat leh Talk Show nei tur tein ruahmanna siam a ni. National Girl Child Day Closing ceremony hi 24th January 2023 ah I&PR Hall ah hman tur a ni ang a. Hemi ni hian Kolasib District chhunga Hospital a naupiang hmeichhia te hnenah lawmpuina naupuan bak ah Rs. 2000 theuh pek an ni bawk ang.