3281/2022-2023

Dated Serchhip, the 18th January, 2023: Vawiin chawhma dar 10:00 khan Serchhip Press Club ah National Girl Child Day, 2023 hawnna hun District Hub for Empowerment of Women, District Programme Office Serchhip huaihawtin hman a ni.

He hunah hian Pi F. Hmingthankimi, District Mission Coordinator chuan kum 2008 atang khan kumtin January ni 24 chu National Girl Child Day atan hman thin anih thu a sawi a, kuminah pawh he ni hi hman leh tur niin hapta khat chhung hman a ni dawn a, vawiin atanga January, 24 thlengin hun hman tur a ni, a ti.

Pi VL Remruatpuii, Gender Specialist pawhin thusawiin Beti Bachao Beti Padhao Scheme chungchang sawifiahna a nei a. He hmalakna hi kum 2015 atang khan kalpui tan niin kum 2018 atang khan Serchhip District ah pawh kalpui tan a nih thu a sawi a. BBBP thiltum ber chu hmeichhe naupangte venhim leh mipuitling ni tura lehkha zirtir a ni, a ti. He hmalakna hnuaiah hian National Girl Child Day pawh hman a nih thu leh Serchhip district ah kawng hrang hranga hna an thawh tawh thute a sawi a ni. Pi Sarah Lalbiakliani, Gender Specialist pawhin thu sawiin kumina National Girl Child Day lawm chhunga an tihtur hmachhawpte a tarlang a ni.

National Girl Child Day pual hian hmeichhe naupang humhim tura thutiam lakna leh signature campaign neih nghal a ni.