3439/2023-2024

Aizawl 23rd January, 2024 : Pi Lalrinpuii, Social Welfare, Tribal Affairs, Women & Child Development Department changtu Minister chuan vawiin khan a Office Chamber, MINECO-ah National Girl Child Day - 2024 denchhenin District puma hman tur Beti Bachao Beti Padhao (BBBP) Scheme chu a tlangzarh.

Pi Lalrinpuii chuan BBBP thiltum ber hmeichhe naupang humhalh leh chawikan a nih angin department mi leh sate leh kalkhawmte chu theihtawpchhuah turin a chah a. Kan naupai laia mipa nge hmeichhia tih hriat tuma thil tih chu dan kalh tlat a ni tih hria a, eng mi pawh lo piang se kan fate chu thliar lo turin a chah a. Mizo hmeichhiate'n dinhmun sang tak tak an chelh theih zelna tura tan lak a pawimawh thu leh infiamna lama hmeichhiate'n hma an sawn zel a, hlawhtlinna an chan zel theih nan anmahni enkawltu nu leh pate'n an fanute an enkawl dan leh an zirtir dan a pawimawh thu sawiin kan tawngkam hman pawh kan fimkhur a ngaih thu a sawi bawk.

Pi Flora Laltanpuii, Deputy Director (W), WCD report tarlan atangin National Girld Child Day - 2024 hi kumtin 24th January-ah hman thin niin kuminah pawh Ministry of Women & Child Development kaihhruainain Hmeichhe naupangte ni pual hapta hi 19th January - 25th January thleng hman a ni dawn a. He ni denchhen hian Programme hrang hrang hman thin niin kuminah pawh thingphun, signature campaign leh pa leh fanu thlalak intihsiakna buatsaih a ni a. Hei bakah hian hmeichhe naupang zirna leh kawng danga mi hmingthate chawimawina leh hmeichhe naupangte ni, 24th January-a Mizoram puma Sawrkar damdawiina hmeichhe nau piangte lawmpuina thilpek neih tura ruahmanna kalpui mek a ni bawk.

Beti Bachao Beti Padhao (BBBP) Scheme hian a tum ber chu Sex Ratio tih that a, hmeichhe nau piang tihpun a ni a. Pi Zoramthangi Chhangte, Director, WCD chuan thu tiam laktirna hun a nei bawk a ni.

NGCD - 2024 denchhen hian New Secretariat Complex-ah Minister leh NGCD Programme a tel sawmbikte'n Pencil Pine thingtiak 9 an phun nghal bawk a ni.

He hun hi Pu K.T. Beicho IRAS, Principal Secretary, SWTAW&CD Department chuan kaihruaiin Pi Zonunpari Sailo, Jt. Director, WCD chuan lawmthu sawiin hun a khar a. He hunah hian WCD Department Officials te, MHIP, Mizo Hmeichhe Tangrual, Health Department aiawhte bakah New Capital YMA te an tel a ni.