Tukin khan National Girl Child Day, 2020 denchhenin Serchhip District Task Force on Beti Bachao Beti Padhao (BBBP) chuan Serchhip khawpui chhungah rally a buatsaiha. School hrang hrang atanga kalkhawm hmeichhe zirlai naupang ten kawng zawhin DC Office tualah bawrhsap Dr. Lalzirmawia Chhangte hovin hun hman a ni.

Rally hi hmun hnihah neih niin zirlai naupang engemawzatin BBBP T Shirt hain banner te nen Bazar atangin DC Office an pan a, chutiang bawkin College Peng atangin zirlai dangten DC Office tual an rawn pan bawk a, DC tualah hian bawrhsap Dr. Lalzirmawia Chhangte, IAS, Pu Denny Lalchhuanawma, MCS, Nodal Officer BBBP leh Mahila Shakti Kendra thawktuten lo dawng sawngin hun hman zui a ni a. He hun kaihruaitu Pu Denny Lalchhuanawma kaihhruaina hnuaiah thutiam sawi rualin bawrhsap Dr. Lalzirmawia Chhangte chuan thusawina hun a hmang bawk.

Dr. Lalzirmawia Chhangte chuan, India ramah hmeichhe faten duhloh an hlawh nasa tawh thin a, nuin an pai lai atanga tihtlak mai te an ching thin a ni. Chutiang thil tha lo chu nuaibo a nih theih nan sawrkar laipui chuan 2015 atang kha Beti Bachao Beti Padhao hmalakna a kalpui tan a. Mizoramah pawh Siaha leh Serchhip ah kalpui a ni. He hmalaknain a tum ber chu fanute venhim leh lehkhazir tir a ni, a ti a. Hmeichhiate chu mipate ang thova engkima theihna nei an ni a, ram dan hnuaiah chanvo intluk kan neia, kan inthliar bik thiang lo a ni, a ti. Rally neia kalkhawm zirlai hmeichhe naupang te chu tum fel tak neia chu an thil tum thleng tura nasa taka lehkha zir turin a fuih a, nu leh pa te pawhin kan fanuten an theiha an peih chhung lehkha ka zirtir hi kan mawhphurhna pawimawh tak a ni, tiin nu leh pate pawimawh te a tarlang bawk a ni.