Vawiin chawhma khan DC Office, Kolasib kawt zawl ah ‘Educate the Child, Save the Girl Child’ tih thupui hmangin ‘National Girl Child Day’ hman a ni a, Pi Sangchhin Chinzah, Deputy Commissioner in he hun hi kaihruaiin DC Office, Kolasiba thawktute nen hmeichhe naupang venhimna kawnga hma la tur a chhechhamna hun an hmang bawk a ni.

Pi Sangchhin Chinzah chuan India ram hmun thenkhat ah mipa leh hmeichhe naupang dinhmun inthlauhna nasa tak awm thin te, fapa neih duh avanga naupai lai atanga mipa nge hmeichhia a nih hriat lawk tum an awm thin thu te leh hmeichhe naute tihtlak hial a thlen thin thu a sawi a. Hengte avang hian Sex ratio ah inthlauhna nasa tak state thenkhat ah chuan a awm thu leh harsatna a thlen thu te a sawi a, Sawrkar laipui chuan hmeichhe naupang humhim nan leh zirtirna tha an dawn theih nan kawng hrang hranga hma a lak thu a sawi bawk a ni. Pi Sangchhin Chinzah chuan Nu te hlut zia sawiin hmeichhia te chu duat thiam a, zirna tha te leh mipate chanvo dawn ang tho an dawn a pawimawh thu a sawi a , Mizoramah hetiang a inthliarna hriat tur a awm lo chu lawmawm a tih thu sawiin India ram state dangte zingah Hmeichhe naupang te dinhmun chawikan kawng a entawntlak leh hma hruaitu kan nih theih nan tan la zel turin kalkhawmte a chah bawk a ni.

Attachment

  • Loading attachment...