Vawiin tlai khan Prime Minister Narendra Modi chu Chief Minister Pu Zoramthanga chuan  New Delhi a chenna hmunah hmu in Mizoram mamawh hrang hrang pawimawh tak tak a sawipui.

Prime Minister Pu Narendra Modi chuan India hmarchhak state puma remna leh muanna a awm theih chu sawrkar laipuiin a ngaihpawimawh thu sawiin, Myanmar nen pawh inlaichhinna tha leh ralmuang tak ramin a neih chhunzawm zel a duh thu a sawi a. Chumi atan chuan Mizoram chuan dinhmun pawimawh taka dingin Mizoram Chief Minister chuan mawhphurhna pawimawh thu a sawi.

Chief Minister chuan Mizoram tana All India Service (AIS) cadre hran siam tura hmalak pui vat turin Prime Minister chu a ngen a. AGMUT Cadre hnuaia officer-te hi state hrang hrangah kum reilo te te chauh awmin, an service na state ah an awm tlangnel tak tak hmanlo thin a. Hemi avang hian mipui nunphung chiang takin an hre hmanlo a, khawtlang mamawh pawh an hrechiang hmanlo fo thin a ni tiin state tan cadre hranpa neih a pawimawh thu a sawi. Chief Minister chuan nikum March ni 18 a State Legislative Assembly in The Mizoram Maintenance of Household Register Bill a lo pass tawh chu a rang lama hman a nih theih nan sawrkar laipui chu hmalak pui turin a ngen a. He Bill hi state chhunga chhungkaw tin chhinchhiahna tur pakhat niin, dan kalh a thiltih hrang hrang - ralthuam leh ruihhlo hralh ruk te, mihringa sumdawnna te, thil tawlh ruk te, ramri kan ruk leh a dangte dona atana tangkai tak tur a nih tur thu leh hmalakna dang awmte nen a inkalh a nih loh thu a sawi bawk.

Prime Minister hnenah hian Pu Zoramthanga chuan Ministry of DONER leh North Eastern Council thawh dan chu felfai taka thliar a, India hmarchhak state mipuiten ministry leh council atanga hmasawnna hna puihna an hmuh thin chu tangkai thei ang bera hman a nih theih nana hmalak tula a tih thu a sawipui a. Non Lapsable Central Pool of Resources (NLCPR) hnuaia hmarchhak state tana hmasawnna hna thawhna tur sum hmanloh a la awmte NITI Aayog leh Ministry of DONER ten Ministry of Finance in release thuai tura an lo dil tawh chu bawhzui vat a nih nan hmalak sak turin a dil bawk. 

External Aided Project (EAP) chu sawrkar tan sum hmuhna hanr tha tak a nih laiin Special Category State-te tan EAP hmuh a harsat chhoh tak dan leh funding pattern thlak a nih theih nan hmalak sak turin a ngen a. Chief Minister chuan 15th Finance Commission kaihhnawih thu pawimawh hrang hrangte a sawipui bawk a. AIIMS zulzuia Mizorama Medical College leh Hospital siam sawipui bawkin, Mizoram chauh nilovin India hmarchhak state zawng zawng leh hmundang atanga chhawr tangkai a nih tur thu a thlen bawk.

Prime Minister Modi chuan Chief Minister thu thlen te chu theihtawp chhuaha a lo bawhzui sak tur thu a hrilh a ni.

Chief Minister hi Mizoram House Resident Commissioner Pu Ajay Choudhary leh OSD Home Pu David Lalthangliana leh official dang ten an tawiawm a ni.