Vawiin khan ANM (Auxiliary Nurse Midwife) School, Lawngtlai chuan an School Auditorium-ah 3rd batch zirlaite lukhum khumtirna leh khawnvar chhi-a thu tiam lakna hun (Capping and Lamp Lighting Ceremony) a vawi khat nan an hmang.

He hun hi Lawngtlai Chief Medical Officer Dr Lalthlamuana'n hmanpuiin, lawmpuina thu leh zirlai tharte fuihna thu a sawi a. ANM School Lawngtlai chu a kum thumna chauh la ni mah se, an result leh sikul inenkawlna thu-ah mit tlung leh chhuanawm hlea a hriat thu sawiin, Principal leh thawktute inpeknaah a fak a. Zirlaite chu an nunah mi dang tan malsawmna ni tur leh thil tha tih kawnga mi dang kawhhmuhtu nih tuma rilru siam tlat turin a chah.

District Hospital Lawngtlaia Nursing Superintendent Pi Lalrintluangi chuan 3rd batch zirlai tharte chu lukhum khumtirin, khawnvar a chhittir a; zirlai tharte chuan thu tiam an sawi rual nghal bawk. Pi Lalrintluangi chuan lukhum chuan mi dang tanpui tura mawhphurhna a ken tel thu leh a rawng var chuan thianghlimna a entir thu sawiin, khawnvar hal chu mi dang tana eng chhuak tur te, inchhem alh tawn tur te leh thiamna leh mawhphurhna inhlan chhawng tura Florence Nightingale-i khawnvar chhit chhunzawm zelna a nih thu a sawi.

He hun hi Tutor Miss RC Vanlalhlimpuii'n kaihruaiin, ANM Female Voice te'n hawnna hla thiam takin an sa a. Christian Hospital Lawngtlaia Ward Superintendent Pi Lalhlimpuii Hrahsel chuan hunserh hmangin, School Principal Pi C. Rothangpuii'n school report tlangpui a sawi a. 1st batch zirlai 2nd year exam-a Mizorama top 10-a lang pali leh 2nd batch zirlai 1st year exam-a Mizorama top 10-a lang pasarih hnenah chawimawina hlan a ni a. Tutor Miss PC Lalhmangaihi'n lawm thu a sawi a. Presbyterian kohhrana Lawngtlai Bialtu Pastor Rev. R. Lalfakawma'n zirlai tharte tawngtaisakna hun a hman bakah, malsawmna nen hun a khar a ni.

ANM School Lawngtlai hi October 2017 khan zirlai 20 awma bul tan niin, 1st batch te hian an zir chhuak tawh a. A tirah chuan CMO Lawngtlai hnuaiah awmin, nikum October thla atang khan Principal kutah Drawing & Disbursing Officer (DDO) thu neihna pek niin, mahnia inrel bawl hrangin an awm tan a. Tunah hian Principal pakhat (1), Tutor pali (4), Non-teaching staff pariat (8) leh zirlai 39 an awm mek a.  Pawl 12 pass hnua zir theih niin, kum 2 zir tur a ni a. Session hi October-September a ni. Tun tumah hian 1st year zirlai sawmpakua (19)-in thu tiam an la thar a ni.

He hunah hian ANM School Lawngtlaia zirlaite bakah, zirlai nu leh pa te, health department-a thawktute leh sawrkar officer te leh tlawmngai pawl ai awhte an tel a ni.